Embaixadór Brazíl iha Timor-Leste, Adelmo Serafin Garcia. Imajen Tatoli/Egas Cristóvão

DILI, 30 juñu 2020 (TATOLI)-Governu Brazíl liuhosi ninia Embaixadór iha Timor-Leste, Adelmo Serafin Garcia Juniór, fó apresiasaun ba Estadu no Governu Timor-Leste tanba servisu maka’as hodi konsege prevene no kombate COVID-19.

“Ami apresia no fó parabéns ba Timor-Leste ne’ebé susesu kombate COVID-19, ita haree nasaun barak ema rihun ba rihun mak mate ba moras ne’e hanesan Brazíl no Amérika Latina mós mate barak maibé Timor-Leste konsege kombate no laiha ema ida mak mate,” dehan Nia ba Jornalista sira iha Palacio do Governo, hafoin hasoru malu ho Primeiru-Ministru, Taur Matan Ruak.

Timor-Leste iha seriedade servisu hodi luta kontra moras pandemia globál ho dalan ida maka taka Fronteira Terrestre no Aeroportu, no Portu.

“Governu Timor-Leste servisu di’ak tebes duni tanba Coronavirus la oho ema ida,” nia reforsa tan.

Entretantu, durante hasoru malu ho Primeiru-Ministru Taur Matan Ruak, ko’alia mós kona-ba kooperasaun entre nasaun rua liliu dezenvolve setór agrikula iha Timor-Leste.

“Ha’u ho Primeiru-Ministru ko’alia mós kona-ba kooperasaun nasaun rua nian liu-liu iha área agrikula nian nune’e bele hasa’e produsaun alimentár no seluk tan iha Timor-Leste,”katak Diplomata ne’e.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here