Komandante Tránzitu Munisípiu Dili, Inspetór Domingos Sarmento Gama. Imajen/Eugénio Pereira

DILI, 30 juñu 2020 (TATOLI)- Asidente tráfegu ne’ebé akontese, ohin iha área Colmera, Dili, purvolta tuku 6:00 dadeer, rezulta Cecaria Lopes da Costa, nia kelen iha parte loos nian tohar.

Komandante Tránzitu Munisípiu Dili, Inspetór Domingos Sarmento Gama, informa, asidente akontese tanba kondisaun  sumaflu  ka lampu merah la funsiona no motorista Melquino Colo ho karreta ho marka Mega Carry SUZUKI ho xapa A.10839 ho velosidade mai husi Colmera soke vítima Cecaria Lopes da Costa ho nia alin-mane ida ho Motór Honda Repsol xapa E.8645 ne’ebé mai husi área Palásiu Governu nian.

“Asidente ne’e akontese tanba ita nia lampu merah seidauk ativu, depois karreta ne’e mai hosi Postu Loja Gloria nian, no motór tesik hosi Palaçio Governo atu ba Tribunál Dili, too kruzamentu nian maka soke rezulta vítima nia kelen-tohar agora iha hela ospitál,” informa Inspetór Domingos ba jornalista Komandu Polísia Munisípiu Dili.

Hafoin akontesimentu ne’e, Polísia Tránzitu Munisípiu Dili too kedas iha fatin hodi lori vítima ba Ospitál Nasionál Guido Valadares no halo kedas identifikasaun iha terrenu hodi halo apreensaun mós ba karreta no motór.

Nia dehan, PNTL seidauk bele klarifika entre parte sira, se mak sala tanba sei iha hela prosesu investigasaun.

Daudaun ne’e PNTL mós investiga ona motorista ne’ebé lori karreta no parte PNTL sei hein mós vítima ne’ebé hala’o hela tratamentu iha ospitál

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here