Logotipu TDD. Imajen/Egas Cristóvão

DILI, 29 juñu 2020 (TATOLI) – Tribunál Distritál Dili (TDD), ohin, kontinua halo julgamentu ba kazu krime administrasaun danoza, pekulatu ho falsifikasaun agravadu ne’ebé deskonfia komete hosi ajente públiku no mós asume kargu xefia na’in-tolu  (3) iha Ministériu Edukasaun (ME) liuhosi Diresaun Nasionál Ensinu Rekorrente ne’ebé halakon osan estadu  (fó prezuiju) $40,197.50.

Ministériu Públiku (MP) notifika Arguidu FLDRB, diretór ida iha Ensinu Rekorrente, Ministériu Edukasaun, ne’ebé  asume hahú hosi tinan 2007 to’o tinan-2012, arguida HNDA nu’udar Xefe Departamentu Material ba Diresaun Nasionál Ensinu Rekorrente, hahú hosi tinan 2008-2010. Arguidu JV iha tinan-2007, nu’udar responsavel ba kobransa reseita naun fiskál  iha Ministériu Edukasaun, nomeadamente iha Diresaun Nasionál Ensinu Rekorrente.

Hanesan Diretór Nasionál ida ba Diresaun Ensinu Rekorrente, arguidu FLDRB , iha tinan-2007, deside hodi fó aluga fatin dormitóriu, aula/salaun, meza no kadeira ne’ebé mak eziste iha Diresaun Ensinu Rekorrente ba Públiku no ONG sira hodi uza. Tanba diresaun ida-ne’e submete ba Ministériu Edukasaun, ho nune’e, Ministériu refere estabelese ekipamentu ka mobiliáriu sira iha fatin dormitóriu nian no halo reabilitasaun ba auditorium ka salaun sira iha Diresaun Nasionál Rekorrente nian ho objetivu hodi uza ba halo atividade sira iha relasaun ho servisu Ministériu Edukasaun nian.

Akontese katak iha tinan-2007, arguidu FLDRB foti desizaun hodi fó aluga fatin ne’e ba Públiku, ho inisiativa rasik sein fó koñesimentu ba Ministru Edukasaun nu’udar arguidu nia Superiór.

Atu fasilita servisu ida ne’e, arguidu FLDRB, deside no indika arguidu JV nu’udar responsavel hodi tau matan ba reseita sira ne’ebé mak hetan husi atividade alugér ne’e. Arguidu JV mak kria oráriu no tarefa ba alugér nian, prepara dokumentu reseita nian hanesan fatura, resibu no nota kompras ka despeza nain, liuhosi autorizasaun arguidu FLDRB, Arguidu JV prepara dokumentu sira hanesan temi iha leten, sein konsulta ho Diresaun Finansas no aprovizionamentu Ministériu Edukasaun nian.

Hafoin prepara tiha dokumentu sira ne’e, hahú husi setembru-2007, atividade alugér ne’e komesa la’o no to’o iha dezembru 2010, mak atividade refere para tanba hetan intervensaun husi Ministru Edukasaun.

Totál reseita ne’ebé hetan hosi atividade alugér ne’e, hahú hosi setembru 2007  to’o dezembru 2010, hamutuk, $40.157.050  depozita iha Banku Mandiri, ho konta-Bankária 2 (rua): a) arguidu JV, QQ Edukasaun naun formal ho númeru konta Bankária 601-00- 0024253-0; b). arguidu JV , QQ Edukasaun naun Formal ho númeru konta bankária, 601- 00-0044475-5.

Kriasaun konta bankária rua ne’e inisiativa hosi arguidu FLDRB nian no arguidu mak autoriza arguidu JV uza nia naran hodi estabelese konta bankária-rua ne’e. Durante osan sira-ne’e rai iha konta bankária rua ne’e, arguidu FLDRB ho arguidu JV mak halo jestaun, no arguidu JV mak iha direitu tomak hodi movimenta osan sira ne’e.

Reseita sira hetan hosi atividade ne’e, hahú hosi tinan-2007 to’o 2010, nia deskrisaun hanesan relata mai ne’e: 1. Tinan-2007: a. Fulan-Setembru : $3.429.00; b. Outubru: $407.00 c. Novembru $899,00 d. Dezembru  $348. Total $5,083,00 2. 2008: a. Janeiru, $270, 00 b. Fevereiru, $260,00. c. Marsu, $300,00 d. Abríl, $3.480,00 e. Maiu, $3.518,00 1. Juñu, $625,00 g. Jullu, $600,00 h. Agusto, $520,00 l. Outubru, $655,00 j. Dezembru, $2.354,00 Total = 12.582,00.

Tinan-2009; a. Janeiru, $100,00 b. Marsu, $3.880,00 c. Maiu, $4.290,00 d. Juñu,  $12.00 e Agusto, $140,00 f. Setembru  $150,00 & g. Novembru $7, 176,00 h. Dezembru, $100,00 Total $15,907,00 4.

Tinan-2010; a. Fevereiru, $1, 450,00 b. Marsu, $51. 894,00 c. Maiu, $156.00 d. Agusto, $124,00 e. Setembru $206,00 f. Novembru $1,450.00 8. Dezembru, $100,00, Total = U$3,975,00 16.

Haktuir relatóriu sita katak , arguidu FLDRB  orienta arguidu JV hodi halo levantamentu ba osan ho montante $37. 701, 80 hodi gasta ba atividade sira iha Diresaun Nasionál Rekorrente nian.
Arguidu FLDRB mós autoriza arguidu JV hodi uza osan ho montante $4.379, hodi konstrui armazén ida iha Diresaun Nasional Ensinu Rekorrente.

Konstrusaun ba armazén ne’e rasik la liuhosi intervensaun Ekipa Aprovizionamentu no Lojístika Ministériu Edukasaun nian, arguidu sira mós la aprezenta kona-ba kompaña ne’ebé mak halo konstrusaun ida ne’e.

Arguidu FLDRB mak kontaktu direita badaen nain-rua (2) hodi konstrui armajen ne’e ho osan reseita naun fiskál. Arguidu FLDRB ho JV utiliza montante $2, 381,00 ba atividade viajen lokál ne’ebé mak lei finanseiru la admite no arguidu sira la aprezenta dokumentu komprovativu sira kona-ba viajen lokál nian.

Arguidu nain mós hateten katak funsionáriu sira iha Diresaun Nasionál Ensinu Rekorrente nian empresta tiha osan ne’ebé mak hetan husi reseita ne’e ho montante $1. 500,00, maibé arguidu sira la justifika ho dokumentu legal ruma no osan refere to’o agora la hatene nia paradeiru.

Iha relatóriu mós deteta katak arguidu sira uza osan ho montante $154, 080,00  sein justifika ho dokumentu ruma. Nune’e mós Iha loron 23/11/2009, Arguidu FLDRB mós fó orientasaun ba arguida HNDA hodi utiliza osan reseita naun fiskál hamutuk USD $ 750,00 hodi halo reparasaun/manutensaun ba karreta Land Cruiser ho xapa matrikula 20-469 G.

Aleinde ida-ne’e, arguidu JV mós entrega osan ho montante $350,00 ba arguida HNDA hodi selu arguida nia oan nia eskola iha Indonesia.

Akontese mós katak, haktuir relatóriu ne’e arguidu sira uza resita naun fiskál hodi sosa material eskritóriu nian, kombustivel, trata dokumentu tránzitu iha fronteira, aluga transporte, sosa tiketi Roo nian atu ba Oe-cuse, sosa material hariis fatin nian, sosa konsumu ba funsionáriu hosi Diresaun Rekorrente nian, sosa sigarru no serveja.

Haree husi relatóriu ne’e, deteta momoos katak utilizasaun orsamentu ba item sira temi iha akuzasaun tuir loloos tama ona iha verba Ministériu Edukasaun nian ne’ebé mak Governu aloka ba iha kada Ministériu idak-idak, arguidu sira la devia uza osan ne’ebé mak mai husi reseita nau fiskál ne’e hodi rezolve kestaun sira ne’e.

Arguidu sira la aprezenta detallu relatóriu kona-ba rekolla reseita no relatóriu gastu nian, tamba dezde inísiu kedan arguidu sira la prepara relatóriu refere, apenas iha de’it livru rejistu osan tama no sai ne’ebé mak antes ne’e arguidu sira prepara ona iha resibu, fatura no nota despeza sira.

Arguidu FLDRB, nu’udar Diretór Nasional Ensinu Rekorrente, bainhira deside hodi fó aluga fatin sira ne’e ba Públiku hodi uza, sein fó koñesimentu ba Ministru Edukasaun nu’udar nia superiór ierárkiku.

Tuir loloos reseita hotu-hotu ne’ebé mak Diresaun Nasionál Ensinu Rekorrente hetan tenke relata ba superiór ierárkiku hodi entrega ba Diresaun Nasionál Finansa Ministériu Edukasaun nian no fundu ne’e hatama direita ba konta Governu nian, arguidu sira la presiza kria tan konta bankária foun, maibé saida mak akontese kontráriu, arguidu FLDRB fó orden verbal ba arguidu JV no arguida HNDA hodi rekolla reseita naun fiskál liuhosi fó aluga fatin sira hanesan salaun ka aula, dormitóriu, refeitóriu, kadeira no meza ba sidadaun, NGO no instituisaun Estadu sira ne’ebé presiza sein intervensaun husi Diresaun Finansa no Lojístika Ministériu Edukasaun nian.

Haree hosi relatóriu kona ba Gastu nian arguidu sira inventa de’it resibu ka fatura sira hodi justifika katak osan sira ne’e gasta ba nesesidade Diresaun Nasional Rekorrente nian, maibé realidade ne’ebé mak iha diresaun ne’e rasik hetan ona orsamentu operasionál ne’ebé aloka ona hosi Governu tuir planu Ministériu nian.

Konsekuénsia direita no nesesáriu hosi hahalok arguidu sira nian ne’e Estadu Timor-Leste, hetan Prejuizu hamutuk  $40,197.50. Husi rezultadu sira iha leten, demonstra katak arguidu sira la kumpre manual Orsamentu Jerál no sistema Aprovizionamentu normal iha Ministériu Edukasaun nian, ne’ebé mak hateten katak reseita hotu-hotu mai hosi Setór Públiku tenke submete ba Ministériu Edukasaun no hatama ba kofre Estadu.

Arguidu sira ne’e hatene hela katak sira ninia konduta ka hahalok ne’e sira halo daudaun hela krime ida kona-ba ezersísiu husi nia funsaun sira hanesan Funsionáriu Públiku. Mezmu nune’e, arguidu sira hakarak duni, deliberadamente, prejudika normál funsionamentu servisu nian no estraga sira ninia imajen iha komunidade sira nia leet.

Arguidu sira hatene hela katak ho sira nia komportamentu ne’e, hatudu katak sira la hatene norma no prosedimentu legal sira kona-ba prestasaun servisu públiku haluha tiha devér jerál sira lealdade, obediénsia, selu no izensaun nian no mós devér espesiál sira funsionáriu públiku nian ne’ebé labele hetan vantajen hosi ninia pozisaun, atu asegura transparénsia no nu’udar administrativa no finansiamentu responsavel atu ezerse nia funsaun sira.

Arguidu sira nu’udar ema ne’ebé ho esperiénsia ona iha prosesu administrasaun no finansa no hatene hela katak sira labele utiliza osan sira la ho kuidadu sein iha relatóriu no resibu jestasaun ne’ebé hamosu prezuiju ba estadu.

Arguidu sira ne’e atua deliberada, livre no konxientemente, sira hatene hela katak sira labele halo hahalok hanesan ne’e no hahalok sira ne’e kontra lei.

MP promove arguidu FLDRB nu’udar ko-autór materiál ho forma konsumada ba iha konkursu real ba krime administrasaun danoza, pekulatu ho falsifikasaun agravadu, previstu no punidu iha artigu 274 n. 2, 295 n. 3 no art. 304 n. 2 hotu-hotu hosi Kódigu Penál no arguida HNDA ho JV nu’udar ko-autór material ho forma konsumada ba iha konkursu real ba krime pekulatu ho falsifikasaun agravadu, previstu no punidu iha artigu 2749 n. 2, 295 n. 3 no art 304 n. 2 hotu-hotu husi Kódigu Penál.

Liuhosi audiénsia julgamentu, ne’e,  sasin ASDR fó sasin katak, iha tinan 2018 sira-nia parte hosi organizasaun RENETIL halo komunika ho arguidu JV hodi husu aluga fatin refere hodi halo konferénsia durante loron rua, maibé nia lembra katak la halo kontratu tanba kongresu loron-rua hafoin remata selu direita kedas, kona-ba montante selu kada loron nia parte la lembra ona.

Prokuradór Jacinto Babo nia parte sei kontinua identifika tan sasin sira seluk hodi notifika nune’e bele mai presta deklarasaun sira iha Tribunál. Hafoin rona tiha deklarasaun ne’e Tribunál deside adia hikas julgamentu ne’e ba iha loron 17 jullu 2020, iha tuku 17:00 otl, hodi kontinua rona sasin sira seluk.

Audiénsia julgamentu ne’e prezide hosi juis koletivu Maria Modesta, João Ribeiro, Maria Solana, Ministériu Públiku reprezenta hosi Prokuradór Jacinto Babo, arguidu sira hetan asisténsia legál hosi Defeza Sebastião Amandio Adelia Melok.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here