Logotipu MEJD

DILI, 25 juñu 2020 (TATOLI)-Ministériu Edukasaun Juventude no Desportu (MEJD) distribui ona máskara hamutuk 10.000 ba eskola sira iha Munisípiu Bobonaro hamutuk 4.000 no Covalima rihun neen.

Diretór Nasionál Lojístika, Manuel de Jesus Santos, informa MEJD distribui uluk ba Munisípiu rua ne’e tanba fronteira diretamente ho Provínsia Nusa Tenggara Timur (NTT) Indonézia ne’ebé daudaun rejista kazu COVID-19 aumenta kada loron.

Estadus Unidus Amérika maka apoiu máskara hamutuk rihun 15 ba MEJD hodi kontinua distribui ba eskola sira iha Munisípiu Bobonaro, Covalima no RAEOA.

“Iha Covalima ami distribui ona máskara 6.000 iha loron 15/05 ba postu haat mak hanesan Salele, Tilomar, Fatumea, no Foho-Lulik, máskara sira ne’e ami fahe direita ba eskola ensinu báziku sentrál depois mak sira sei distribui fali ba eskola filiál idaidak,”dehan Diretór ne’e ba TATOLI, iha Vila Verde Dili, kinta ne’e.

Kona-ba apoiu ba RAEOA, Eis Ministra Edukasaun Juventude no Desportu, Dulce de Jesus Soares, entrega ona máskara ne’e ba  eis Prezidente Autoridade RAEOA, José Luis Guterres, foinlalais iha Dili, maibé seidauk distribui ba Oé-Cusse tanba kestaun orsamentu no fronteira terrestre ne’ebé sei taka difikulta ekipa atu halo distribuisaun.

“Sira nia máskara 5.000 ne’e sei iha hela Ministériu ita seidauk lori ba tanba difikuldade iha fronteira no limitasaun orsamentu, tanba Oé-Cusse la’ós máskara de’it maibé iha livru kuaje 4.000, motor lima inklui kadeira no meja,” nia hatutan.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here