Ofisiail Funsionariu husi Ministeriu Solidaderidade kontinua atende no halao pagamentu subsidiu $200 ba komunidade sira. Imajen/Antonio Goncalves

DILI, 25 juñu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten prosesu pagamentu subsídiu $200 ba Rejiaun Administrativa Espesiál Oé-Cusse Ambeno (RAEOA) sei hahú halo iha loron 04 jullu 2020.

“Xefe Suku sira hosi RAEOA sei foti osan iha Banku Nasionál Komérsiu Timor Leste (BNCTL-sigla portugés) iha loron 3 jullu 2020 no loron 4 jullu 2020 halo ona prosesu pagamentu subsídiu $200 ba Ita-nia benefisiáriu sira iha RAEOA,” dehan Diretór Jerál MSSI, Rui Manuel Gago Expostu ba Agênsia TATOLI iha nia knaar fatin MSSI, Caicoli, Dili, kinta ne’e. 

Nia hateten, ekipa pagamentu RAEOA mak sei prepara nia ekipa depois mak MSSI fó formasaun no mós halo sosializasaun ba xefe suku no ekipa ne’ebé mak sei halo pagamentu.

Formasaun refere, nia hatutan, hala’o iha loron tolu (3) de’it no loron tolu (3) elabora relatóriu bainhira prosesu pagamentu finaliza ona.

“Maibé ita-nia prosesu pagamentu ne’e ba loron sanulu (10), parese prosesu ne’e tomak hamutuk loron 17 tanba ita mós sei halo viajén,” nia esplika.

Ekipa pagamentu hosi nasionál, nia informa, parese ema na’in-5 hanesan ne’e mak ba akompañia prosesu pagamentu subsídiu $200 iha RAEOA nian tanba bainhira iha prosesu nia laran mak problema ekipa nasionál bele ajuda.

Nia dehan, totál osan benefisiáriu hosi RAEOA hamutuk $4.000.000 ho totál benefisiáriu hamutuk 20.000.

Jornalista : Osória Marques

Editór     :  Cancio Ximenes

HAKEREK NO HATÁN

Please enter your comment!
Please enter your name here