Logotipu Tribunál Distritál. Imajen/Egas Cristóvão

DILI, 25 juñu 2020 (TATOLI) – Tribunál Distritál Dili (TDD), ohin, hala’o julgamentu ba arguidu DAG ne’ebé deskonfia baku kuak moru Hospital Nasionál Guido Valadares (HNGV) hodi rezulta inundasaun bee tama hospital laran hodi estrada sasán no ekipamentu sira iha tinan 2017.

Akuzasaun husi Ministériu Públiku nian haktuir katak iha tinan 2017 tempu udan boot komunidade sira hela iha moru kotuk Hospital Nasionál Guido Valadares (HNGV) nian baku kuak moru ospitál nian no bee fo’er sulin ba ospitál laran.

Iha altura ne’ebá autoridade HNGV hamutuk ho autoridade lokál rezolve tiha problema refere no HNVG mak hasai orsamentu hodi reabilita fali. Maske nune’e,  iha  fali loron 11 marsu 2019 tempu kalan, arguidu DAG ho inisiativa rasik baku kuak fali moru refere tanba bee nalihun maka’as durante tan udan boot ne’ebé afeta ba komunidade uma-kain neen (6) nia uma ne’ebé hela rabat iha moru hun HNGV.

Arguidu nia asaun ne’e  hamosu prejuizu ba sasán Estadu nian ho hahalok konsientemente, livre derivada no hatene katak, bainhira baku kuak moru sei afeta bee fo’er tama ba laran prejudika sasán ospitál nia tanba ne’e salva arguidu no nia família.

Arguidu mós hatene katak, nia hahalok ne’e nu’udar hahalok krime ne’ebé lei bandu maibé kontinua halo. Tanba ne’e MP promove arguidu nu’udar autór materiál ho forma konsumada ba krime Danu Agravadu iha artigu 259/1 alínea a) iha kódigu penal Timor-Leste.

Hatán ba akuzasaun hosi MP nian ne’e, arguidu DAG hateten, balun loos no la loos tanba momentu ne’ebá baku kuak moru la’ós nia mesak, maibé ema barak tanba situasaun bee-nalihun maka’as iha komunidade sira-nia uma ne’ebé hela raba iha moru hun ospitál nian.

Nia dehan, momentu ne’ebá baku kuak moru fatin tolu hodi bee bele sirkula sai, maibé bee-sulin hosi moru kuak tuir dalan la tama ba ospitál laran.

Nia mós rekoñese sira nia parte la fó hatene autoridade HNGV kona-ba baku kuak moru, maibé hafoin ne’e nia rasik hola inisiativa hodi taka fali moru ne’ebé kuak.

Sasin ho inisiál CPP nu’udar enfermeira iha HNVG dehan, tuir nia observasaun hosi kauza baku kuak moru mak bee tama maka’as hodi rezulta inundasaun iha ospitál laran, liu-liu iha sala emerjénsia nian, nune’e afeta hodi momentu ne’ebá labele atende pasiente.

Sasin  seluk ho inisiál CD nu’udar funsionáriu auditoria HNGV hateten, momentu ne’ebá nia parte laiha ospitál, maibé rona tutan informasaun hosi nia supervizora, nune’e hafoin akontese iha dadeer sira observa katak bee refere tama iha kampu ospitál nian nakonu entaun hodi tama ba iha sala emerjénsia mai to’o iha seguransa sira-nia fatin ne’ebé tur ba.

Hafoin rona tiha deklarasaun hosi parte sira, Tribunál husu kedas alegasaun hosi parte Ministériu Públiku no Defeza.

Prokuradór António Tavares husu Tribunál atu aplika sansaun tuir lei ne’ebé iha no husu arguidu atu hadi’a fila-fali moru ne’ebé baku kuak.

Henrique Maris nu’udar defeza husu Tribunál atu tetu ho konviksaun haree ba kondisaun sira. Ho nune’e, Tribunál liuhusi  Juiz koletivu Ivan Suritai, Maria Solana no  Argentino Nevers, deside adia hikas julgamentu ne’e ba iha loron 8 jullu, tinan ne’e, iha tuku 11:00 OTl, hodi rona desizaun finál.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here