DILI, 24 juñu 2020 (TATOLI) – Konsellu Ministru aprova deliberasaun hodi atribui kompeténsia ba Embaixadór Timor-Leste iha Pekin, Abrão dos Santos hodi halo asinatura ba akordu ho Repúblika Populár Xina.
“Ezekutivu aprova Projetu Deliberasaun hodi atribui ba Embaixadór Timor-Leste nian iha Pekin hodi halo assinatura ba akordu ho Repúblika Populár Xina, atu fornese asisténsia militár gratuita mai Timor-Leste,” relata Ministru ba Prezidénsia Konsellu Ministru, Fidelis Manuel Leite Magalhães hafoin reuniaun Konsellu Ministru iha Palásiu Governu, kuarta ne’e.
Governante ne’e dehan, tuir loloos Ministru Defeza no Ministru Interiór interinu, Filomeno da Paixão de Jesus mak asina akordu refere maibé tanba COVID-19 no labele desloka ba Xina, entaun husu Embaixadór iha Xina maka reprezenta Governu Timor-Leste asina.
Antes ne’e, iha loron 14 agostu 2019, Repúblika Populár Xina entrega ekipamentu ba FALINTIL-Forsa Defeza Timor-Leste (F-FDTL), ne’ebé kompostu husi karreta hitu, botas 3600, mala 3.600, kama 3.600, armáriu 180 ho tenda militár nian 80.
Jornalista: Antónia Gusmão
Editora: Julia Chatarina