Prezidente Komisaun Funsaun Públika (CFP-sigla portugés), Faustino Cardoso Gomes. Imajen/Antonio Goncalves

DILI, 24 juñu 2020 (TATOLI)–Prezidente Komisaun Funsaun Públika (KFP), Faustino Cardoso, hateten públiku hotu-hotu inklui KFP mós preokupa ho funsináriu sira ne’ebé mak ho idade avansadu ona, maibé seidauk iha dekretu-lei atu define funsionáriu ho idade avansadu sira.

“Ita seidauk iha dekretu lei ida hodi define ba funsionáriu ho ideia avansadu, ne’ebé mak obriga ema ho atinje idade saida mak bele ka tenke reforma iha nia servisu. Maibé ita iha duni lei kona ba Seguransa Sosiál (SS), lei 12/2016, maibé lei ne’e la define konkretamente ema ho idade hira maka bele reforma. Se nia idade define atu reforma ne’e oinsá karik nia rasik la hatama nia pedidu ba reforma nian,” dehan Faustino Cardoso ba jornalsita sira iha Ministériu Finansa, Aitarak-Laran, kuarta ne’e. 

Nia hateten, oinsá instituisaun bele hatene katak ema ne’e idade reforma ona maibé sei nonook hela de’it tanba ne’e mak KFP hato’o ona proposta ho dekretu-lei ida planeamentu forsa traballu nian, ne’ebé define katak to’o iha idade 60, funsionáriu públiku tenke reforma ona.

“Maibé dekretu-lei ne’e sei iha faze proposta, seidauk hetan diskusaun. Satán, aprovosaun Konsellu Ministru tanba ita hatene evulusaun polítika ladún permite atu sai prioridade ba iha prosesu ida,” nia esplika.

Ida seluk, nia dehan, mak limita ema-nia direitu ne’e labele regula ho dekretu-lei tanba limitasaun direitu ne’e kompeténsia eskluziva Parlamentu Nasionál (PN) nian, tanba ligadu ho limitasaun direitu ema-nian.

“Relasiona ho idade reforma nian, ami ko’alia ona iha PN no distintu deputadu balun mós preokupa ho asuntu ne’e. Maibé, ita hein de’it bainhira PN hakarak tau prioridade importánsia maka ita hein. Ita hotu hein, PN atu bele oinsá proposta altersaun ba lei 12/2016, hodi asegura katak funsionáriu públiku ne’ebé mak idade reforma ona tenke fó fali biban ba ema seluk,” nia dehan. 

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here