Formador husi Fundasaun Alola hasai foto hamutuk ho pesoal saude 36 husi Munisipiu Dili. Imajen/Felicidade Ximenes.

DILI, 24 juñu 2020 (TATOLI)-Institutu Nasionál Saúde iha tinan 2019 liubá oferese ona formasaun ba profisionál saúde kompostu husi médiku, enfermeiru, parteira, tékniku hamutuk ema na’in 1.503 husi Munisípiu 12 inklui Rejiaun Administrativa  Espesiál Oé-Cusse Ambeno (RAEOA).

Diretóra Formasaun Institutu Nasionál Saúde,  Dircia Maria Soares, hateten formasaun ne’e foka liuba jestaun klínika atu atende kazu dengue, atendimentu ba pasiente, formasaun jestaun ospitál no seluk tan.

Iha tinan 2020, INS fó de’it formasaun  ba profisionál saúde sira hamutuk ema na’in 79 kona-ba prevensaun COVID-19 tanba hetan tulun orsamentu no tekniku husi Parseiru Internasionál UNICEF, Uniaun Europeia no Organizasaun Mundiál Saúde (OMS).

Aleinde ne’e, nia esplika durante semana ida ne’e nia parte mós fó formasaun ba pesoál saúde hamutuk ema na’in 36 husi Munisípiu Dili nian kona-ba pakote integradu suporta inan.

”Agora daudaun Ita fó formasaun pakote integradu inan  ba médiku, enfermeiru sira para atu eleva nafatin sira-nia kapasidade para oinsá atu halo konselamentu ba bebé no oinsá prátika  fó han labarik ho di’ak,”dehan Nia ba TATOLI iha INS Comoro, kuarta ne’e.

Ho formasaun ne’e sei tulun pesoál saúde sira atu iha koiñesimentu kle’an hodi tuun ba terrenu para tulun grupu suporta inan, liliu oinsá bele promove edukasaun nutrisaun ba inan ho labarik, formasaun saúde ambientál, prevensaun moras sira ba inan no labarik sira.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here