Susu Dengue.Imajen/TATOLI

DILI, 24 juñu 2020 (TATOLI)-Tuir relatóriu husi Ospitál Nasionál Guido Valadares (HNGV-sigla portugés) fó sai hahú husi fulan-janeiru to’o meadu juñu ne’e, rejista kazu pasiente ho moras dengue hamutuk ema na’in 349, no na’in 11 mate.

Xefe Unidade Pediátria HNGV,  Breviado dos santos, hateten husi totál pasiente dengue 349, na’in 338 maka konsege rekupera hafoin halo tratamentu saúde no na’in 11 la konsege tanba mai ho kondisaun grave.

”Ema na’in 11 mate ne’e husi labarik hotu no idade tinan lima mai kraik tanba sira mai ho grave ona entaun ami labele salva sira-nia vida,” dehan nia ba TATOLI, iha HNGV, kuarta ne’e.

Pasiente dengue hirak ne’e barak liu hosi Munisípiu Dili no Ermera, sira mai ho kondisaun grave hanesan raan sai husi inus no ibun tanba ne’e maka profisionál saúde sira la konsege salva sira-nia vida.

”Ita-nia tratamentu ba moras dengue ne’e másimu loron neen no minímu loron haat ezempu sira mai ho dengue kmaan de’it entaun halo tratamentu loron tolu ka haat de’it maibé mai ho dengue ne’ebé mak grave oituan entaun másimu loron neen,”tenik tan.

Xefe Unidade Pediátria ne’e husu ba komunidade atu lori oan no família ba halo tratamentu sedu iha Sentru Saúde no Ospitál bainhira hetan moras ho sintoma dengue.

”Tanba labarik ida mak hetan ona moras dengue iha família ida entaun labarik ne’e laiha vontade atu han no  hemu sente kabun laran moras maibé dalaruma ida ne’e inan-aman sente baibain to’o grave mak lori mai entaun ita mós labele salva sira nia vida,”nia hateten.

Tuir nia meius prevensaun ne’ebé maka ema idaidak tenki halo  presiza hamoos haris fatin kada semana dala rua, taka bee nalihun sira, toba iha muskateiru laran, hakoi lata mamuk sira no moris iha ambiente saudavel.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here