Profisionál saúde sira halo kampaña nasionál fase liman hodi prevene COVID-19 iha resintu HNGV. Imajen Tatoli/António Gonçalves

DILI, 24 juñu 2020 (TATOLI) – Konsellu Ministru (KM) aprova Projetu Proposta lei, ne’ebé aprezenta husi Ministru ba Prezidénsia Konsellu Ministru, Fidelis Manuel Leite Magalhães, ba alterasaun dahuluk ba Lei númeru 10/2004, 24 novembru nian kona-ba Lei Sistema Saúde.

“Ho alterasaun ida-ne’e, autoridade kompetente sira iha matéria vijilánsia epidemiolójiku no sanitáriu atu uza mekanizmu protesaun ba saúde públika ho objetivu atu evita no neutraliza risku atu moras ne’e labele da’et ba populasaun,” relata Ministru Fidelis, hafoin reuniaun ezekutivu iha Palásiu Governu, kuarta ne’e.

Governante ne’e esplika, entre medida protesaun ba saúde públika ne’ebé inklui iha diploma ida-ne’e, sei iha mós possibilidade atu ema sé de’it tenka halo ezame médiku no bainhira deskonfia moras ruma ne’ebé inklui mós iha lista ne’ebé prevee ona iha lei ka regulamentu administrativu, maka tenke lori ba internamentu ka tratamentu kompulsivu ba fatin izolamentu no kuarantena.

“Iha situasaun ne’ebé a’at liu ka emerjénsia ruma ba saúde, bele mós fó orden atu halo konfinamentu obrigatóriu,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here