Forsa EUA bainhira to’o iha TL. Foto Media embaixada EUA

DILI, 23 juñu 2020 (TATOLI)- Embaixadóra Estadus Unidus Amérika iha Timor-Leste,  Kathleen M. Fitzpatrick, relata to’o meadu juñu 2020 ne’e, Forsa Navál Amérika konsege implementa ona projetu infraestrutura bázika liliu halo reabilitasaun no kontrusaun foun ba eskola hamutuk 100 dezde 2009 to’o 2020.

Kathleen M. Fitzpatrick, hato’o asuntu ne’e, tersa ohin hafoin inagura eskola Ensinu Báziku Sentrál Fatumeta no EBF Bairo-Pite tanba durante ne’e hetan reabilitasaun husi Forsa Enjinária Seabees Navál ho orsamentu hamutuk $ 163.000.

Projetu ne’e inagura husi Ministra Edukasaun Juventude no Desportu Demisiária, Dulce de Jesus Soares ho  Embaixadóra EUA, Kathleen M. Fitzpatrick, no hetan partisipasaun Eis Prezidente  Repúblika, José Ramos Horta.

“Ha’u haksolok anunsia katak Forsa Naval kompleta ona sira-nia projetu ba dala  100 iha tinan 10 nia laran, sira servisu maka’as iha Timor-Leste,  Amerikanu no Amerikana sira husi konstrusaun movel hatudu ona sira-nia vontade hodi servisu ho laran no domin ba projeitu ida ne’e atu garante sala eskola sira ne’e bele iha kualidade ida di’ak no furak,”dehan  Kathleen M. Fitzpatrick iha ninia diskursu.

Nia hatutan, projetu hirak ne’ebé durante ne’e implementa ona husi Forsa Naval EUA nian kontribui mós ba polítika Governu Amerika nian ba suporta dezenvolvimentu TL.

Nia hateten Forsa Naval batallaun V Konstrusaun Movel  ninia misaun ramata ona no iha tempu badak sei fila hikas ba Amérika.

Maibé Forsa Naval grupu III sei mai Timor-Leste hodi implementa projetu  infraestrutura iha eskola tolu iha Munisípiu Baucau ho estimasaun osan $ 350.000, kontrusaun moru iha Aeroportu Baucau ho orsamentu Millaun $ 10.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here