Membru VIII Governu na’in-21 simu pose husi Prezidente Repúblika, Francisco Guterres ‘Lú Olo’, iha Palásiu Prezidensiál, Bairro Pité, kuarta (24/06). Imajen Tatoli/António Gonçalves

DILI, 24 juñu 2020 (TATOLI) – Hafoin fó pose ba Membru Governu na’in-21, Prezidente Repúblika (PR), Francisco Guterres ‘Lú Olo’ husu atu servisu ho efisiénsia no efikásia, nune’e bele fó moris di’ak ba povu.

“Ha’u hakarak ko’alia ho neon nakloke ba imi hotu. Hili ekipa di’ak ida sai fatór importante ba susesu, maibé ida-ne’e de’it la to’o atu hetan susesu. Atu hetan susesu, Governu tenke iha kompeténsia, kapasidade, responsabilidade, dedikasaun no dezempeñu ho efikásia. Ha’u ko’alia kona-ba efikásia, efisiénsia no sustentabilidade,” tenik Xefe Estadu iha ámbitu pose ba Membru Governu na’in-21 iha Palásiu Prezidensiál, Bairro Pité, kuarta ne’e.

Aman Nasaun ne’e mós hato’o saudasaun espesiál ba Membru Governu ne’ebé hetan kargu foun no biban hanesan fó fiar Primeiru-Ministru, Taur Matan Ruak tanba hatene dirije gerrilla iha momentu hirak ne’ebé susar tebes maibé konsege kaer metin FALINTIL ho prinsípiu “poupa ita-nia forsa no hamate inimigu iha kada kombate”.

“Ita-Boot sira bele uza esperiénsia horiuluk nian hodi aplika ba situasaun ohin loron nian, atu halo governasaun ne’ebé sustentável no hala’o dezenvolvimentu país nian ba moris-di’ak ba ita-nia ema liu tokon ida, ne’ebé hein ho fiar ida ne’e,” apela Xefe Estadu.

PR Lú Olo komprometidu kontinua apoiu Xefe Governu no ninia membru sira liuhosi kna’ar konstitusionál hodi hetan susese, maski susesu ne’e sei depende liu ba Governu rasik.

“Ukun Nasaun la’ós de’it oportunidade ida, maibé responsabilidade boot ida ba Governu nu’udar órgaun koletivu no ba mós membru Governu ida-idak,” Xefe Estadu enkoraja.

Atu lori moris di’ak ba Povu, Aman Nasaun ne’e husu ba líder partidu sira presiza iha maturidade no bankada parlamentár sira, Deputadu ida-idak  tenke servisu maka’as hodi bele kumpre promesa sira ne’ebé hato’o iha kampaña eleitorál no tenke mós iha aten-barani atu hatán ba povu kona-ba  saída mak sira halo.

Xefe Estadu mós fó hanoin ba partidu polítiku sira labele sai de’it mákina hodi manán eleisaun, maibé presiza promove responsabilidade polítika no sívika no hasa’e  konxiénsia kona-ba sidadania.

“Partidu polítiku sira, Deputadu sira no Governu tenke fó sira-nia kontribuisaun hodi kumpre promesa eleitorál sira no Programa Governu nian iha Lejizlatura ida-ne’e,” nia sujere.

Entretantu, Prezidente Repúblika fó pose ba membru Governu Konstitusionál na’in-21, liuhosi Dekretu Prezidente Repúblika,  númeru 53/2020, ne’ebé uza kompeténsia Konstitusionál tuir artigu 106 númeru 2, hafoin nomeia Vise Primeiru-Ministru no Ministru Planu no Ordenamentu,  José Maria dos Reis, Ministru Koordenadór Asuntu Ekonómiku, Joaquim Amaral, Ministru Negósiu Estranjeiru no Kooperasaun, Adaljiza Albertina Xavier Reis Magno, Ministru Edukasaun, Juventude no Desportu, Armindo  Maia,  Ministru Turizmu, Komérsiu no Indústria,  José Lucas do Carmo da Silva, Ministru Interiór, Taur Matan Ruak, Ministru Petroleu no Minerál , Victor da Conceição Soares.

Nune’e mós, Vise-Ministru Negósiu Estranjeiru no Kooperasaun, Julião da Silva, Vise-Ministru Justisa, José Edmundo Caetano, Vise-Ministru Administrasaun Estatál, Lino de Jesus Torrezão, Vise-Ministru Saúde, Bonifacio Mau Coli dos Reis, Vise-Ministru Edukasaun, Juventude no Desportu, António Guterres, Vise-Ministru Komérsiu no Indústria, Domingos Lopes Antunes, Vise-Ministru Turizmu Komunitária no Kulturál, Inacia da Conceição Teixeira, Vise-Ministru Agrikultura no Peskas, Abilio Xavier de Araújo, Vise-Ministru Interiór, Antonino Armindo.

Iha biban ne’e, PR Lú Olo mós fó pose ba Sekretáriu Estadu Formasaun Profisionál no Empregu, Alarico de Rosário, Sekretáriu Estadu Kooperativa, Elizario Ferreira, Sekretáriu Estadu Peska, Elídio de Araújo, Sekretáriu Estadu Juventude no Desportu, Abrão Saldanha, Sekretáriu Estadu Protesaun Sivíl, Joaquim José Gusmão dos Reis Martins.

Iha biban ne’e, Xefe Estadu fó pose ba  Membru Governu dala-rua ona, iha pose dahuluk fó ba Membru Governu na’in-ualu, nune’e totál membru VIII Governu Konstitussionál hamutuk na’in-43.

Marka Prezensa iha serimónia pose ne’e, Prezidente Parlamentu Nasionál, Aniceto Guterres, Prezidente Tribunál Rekursu, Deolindo dos Santos, Deputadu sira, Membru Governu atuál VIII Governu, Eis Primeiru-Ministru, Marí Alkatiri, Korpu Diplomátiku sira, Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, Komandante Jerál Polísia Nasionál Timor-Leste (PNTL), Komisáriu Faustino da Costa  Konseleiru Partidu KHUNTO, José Naimori, família emposadu no konvidadu seluk.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here