Ekipa WFP iha Timor-Leste hamutuk ho ekipa Malaysia Airlines akompaña hatun sasán iha Aeroportu Internasionál Prezidente Nicolau Lobato. Imajen/ONU Timor-Leste

DILI, 22 juñu 2020 (TATOLI) – Programa Ai-han Mundiál husi Nasaun Unida (WFP, sigla inglés) oferese ajuda liuhosi servisu aéreu umanitáriu ne’ebé liga Timor-Leste ba sentru lojístiku WFP nian iha Kuala Lumpur, Malázia ho aviaun Malaysia Airlines ne’ebé charter fasilita husi organizasaun mundiál ne’e.

Ministru Transporte Komunikasaun, José Agostinho da Silva, informa voo dahuluk lansa ona iha loron 14 juñu no aviaun ne’e lori sasán umanitáriu no médiku importante ba Timor-Leste inklui fasilita mós movimentu traballadór umanitáriu ne’ebé apoia Governu no komunidade sira-nia intervensaun hasoru COVID-19.

Ministru Transporte Komunikasaun, José Agostinho da Silva. Imajen Tatoli/Egas Cristovão

“Sira-nia viajen mai Timor-Leste dala tolu de’it, iha loron 14 juñu, 21 horiseik no iha sei mai iha loron 28 juñu, bazeia ba pedidu WFP ba Governu,” tenik  Ministru José Agostinho ba iha Palásiu Governu, segunda ne’e.

Nia dehan, husi parte Ministériu Transporte no Komunikasaun (MTK) akompaña Autoridade da Aviasaun Civil de Timor-Leste (AACTL) fó lisensa voo.

“Ha’u akompaña parte ita-nia fasilita flight approval ba sira. Karik iha futuru  iha tan pedidu balun maka ita fasilita,” nia akresenta.

Bainhira WFP hahú halo intervensaun iha 1 maiu, transporta ona pasajeiru hamutuk 3.000 resin, ne’ebé semo ona bá destinasaun hamutuk 40. 

Relasiona ho transporte kargo, WFP tula ona sasan umanitáriu no saúde hamutuk metru kúbiku 17.000 ba nasaun 130 lori organizasaun na’in-33 nia naran.

Organizasaun mundiál ne’e oferese mós ró no kamiaun barak atubele tula sasán sira husi ajénsia ONU no organizasaun naun-governamentál sira. 

Hahú husi loron ikus janeiru, WFP, Organizasaun Mundiál ba Saúde (OMS) no komunidade internasionál hahú haruka ona sasán umanitáriu inklui médiku ba nasaun 121 husi sentru lojístiku globál no rejionál, inklui Kuala Lumpur no Guangzhou, Xina, ne’ebé lokaliza iha Ázia.

Iha Ázia no Pasífiku, voo ne’ebé aluga husi WFP fó ona apoiu ba intervensaun hasoru COVID-19 iha Afghanistaun, Bangladesh, Laos, Myanmar, no Nepál, maibé iha fatin balun servisu hmanitáriu neme hetan suspensaun ona desde marsu tanba pandemia.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here