Prezidente eleitu, Francisco Guterres Lu-Olo ho Prezidente sesante, Taur Matan Ruak hasoru malu iha Palásiu Prezidensiál foin lalais ne'e. Foto espesiál

DILI, 22 juñu 2020 (TATOLI)–Prezidente Repúblika, Francisco Guterres “Lú Olo”, sei fó pose ba membru Governu foun na’in-21 hodi kompleta VIII Governu Konstitusionál iha kuarta-feira loron  24 fulan juñu tinan 2020, iha tuku 16.30 lorokraik.

Tuir komunikadu ne’ebé fó sai hosi Prezidénsia Repúblika haktuir, Prezidente Repúblika sei pose ba Vise Primeiru-Ministru ne’ebé sei kaer mós pasta Ministru Planu no Ordenamentu, Ministru Koordenadór Assuntus Ekonómikus, Ministra Negósiu Estranjeirus, Ministru Edukasaun, Juventude no Desportu, Ministru Turismu, Komérsiu no Indústria, Ministru Interior, Ministru Petróleu no Minerais.

Iha biban ne’e, komunikadu ne’e hateten, PR mós sei fó pose ba Vise-Ministru Negósiu Estranjeiru no Kooperasaun, Vise-Ministru Justisa, Vise-Ministru Administrasaun Estatal, Vise-Ministru Saúde, Vise-Ministru Edukasaun, Juventude no Desportu, Vise-Ministru Komérsiu no Indústria, Vise Ministru Turismu Komunitáriu no Kulturál, Vise-Ministru Agrikultura no Peskas, Vise-Ministru Interior, Sekretáriu Estadu Formasaun Profisionál no Empregu, Sekretáriu Estadu Kooperativas, Sekretáriu Estadu Peskas, Sekretáriu Estadu Juventude no Desportu no Sekretáriu Estadu Protesaun Sivil.

Iha Dekretu-Lei  kona-ba Orgánika Governu,  ne’ebé Prezidente Repúblika promulga, iha 18 juñu 2020 no Governu haruka  publika ona iha Jornal Repúblika, iha 19 Juñu 2020, fó-sai katak VIII Governu Konstitusionál konstitui ho Primeiru-Ministru, Vise-Primeiru Ministru rua, Ministru Prezidénsia Konsellu Ministru, Ministru Koordenador ba Asuntu Ekonómiku, Ministru sira, Vise-Ministru sira no Sekretárius Estadu.

Membru hotu-hotu ne’ebé halo parte VIII Governu sei partisipa iha serimónia pose ne’ebé sei hala’o iha Palásiu Prezidensiál Nicolau Lobato, Bairru Pité, Dili, kuarta aban.

Jornalista : Cipriano Colo

Editór      :  Cancio Ximenes

HAKEREK NO HATÁN

Please enter your comment!
Please enter your name here