Ministru Defeza no Ministru Interiór Interinu, Filomeno da Paixão de Jesus. Imajen/ Egas Cristovao

DILI, 22 juñu 2020 (TATOLI)- Governu Timor-Leste liuhosi Ministériu Interiór hasai ona despaixu  ida hodi haruka ba Diresaun Nasionál Servisu Migrasaun (DNSM) iha semana kotuk atu hahú loke hikas ‘portaun’ fronteira terrestre Motain hodi simu movimentu sidadaun Timoroan husi estranjeiru mai Timor-Leste.

Despaixu ne’ebé asina diretamente hosi Ministru Defeza no Ministru Interiór Filomeno da Paixão de Jesus ne’e, fó autorizasaun ba Servisu Migrasaun iha Fronteira Terrestre sira, atu loke iha  loron kuarta, kada semana, iha oras-rua nia-laran husi  tuku 9:00 to’o tuku 12:00 Otl, hodi simu entrada Timoroan sira husi nasaun estranjeiru.

Ministru Filomeno Paixão de Jesus, responde jornalista sira, ohin, Palacio do Governo, katak fronteira sei loke kuarta kada semana no Servisu Migrasaun halo de’it kontrola ba sira-nia pasaporte, maibé atu kontrola sidadaun sira-ne’e nia kondisaun saúde liga ba surtu Coronavirus ka COVID-19, ne’e kabe ba kompeténsia Ministériu Saúde.

“Ne’e so Ministériu Saúde maka bele hataan, se iha ona dekretu lei autoriza ona, tenke loke fronteira kada kuarta para ema tama no sasán merkadoria mós bele tama, ne’ebé ida ne’e sei hala’o ba oin,” hateten Ministru Filomeno da Paixão.

Ministru Filomeno dehan, karta despaxu loke fronteira ne’e hato’o ona iha semana kotuk ba Diretór Jerál Servisu Migrasaun, Superintendente Polísia, Agostino da Silva Gomes.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here