Ilustrasaun ema iha sela laran. Imajen/Foti hosi Google

DILI, 22 juñu 2020 (TATOLI)-Estudante Universidade da Paz (UNPAZ), hamutuk ema na’in 14 oras ne’e detein hela iha sela Komandu Polisia Nasionál Timor-Leste Munisípiu Dili hodi submete ba prosesu interogatóriu dahuluk iha Tribunál Distritál Dili, relasiona ho kazu Hendrique Maia Soares, ninia mate iha areadór UNPAZ.

“Ami koopera ho justisa, tan ne’e ha’u rasik ba presta mós deklarasaun iha Polisia Eskuadra Aimutin relasiona ho kazu joven Hendrique nia mate,”dehan Reitór UNPAZ, Adolmando Amaral, ba jornalista sira iha Ai-Mutin, segunda ne’e.

“Ha’u nia estudante sira iha hotu ona polisia nia liman, ne’e hatudu katak UNPAZ hakarak koopera, maske ita seidauk hatene loloos motivu husi akontesimentu ne’e,” tenik Adolmando.

Hafoin akontese kazu ne’e, Reitór ne’e dehan akompaña kedas estudante na’in 14 hodi ne’e presta deklarasaun ba polisia eskuadra Ai-Mutin Comoro iha domingu ne’e.

Reitór ne’e fiar katak estudante sira sei koopera ho parte justisa hodi deklara loloos kona-ba akontesimentu ne’e para bele hetan lialos.

“Ita hotu hein sira ninia prosesu fó fiar ba sira atu bele haloos tiha informasaun ne’ebé espalla ho versaun oin-oin iha públiku,”katak Nia.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here