Prezidente KKLN, Vidal de Jesus ‘Riak Leman’. Imajen TATOLI/António Gonçalves

DILI, 22 juñu 2020 (TATOLI)–Conselho dos Combatentes de Libertação Nacional (CCLN-sigla Portugés), kontinua apoiu VIII Governu Konstitusionál tanba konsidera nasaun labele hakiduk fali ba kotuk.

“CCLN haree katak, Governu ida agora ne’e la’o di’ak hela. Hotu-hotu fó apoiu kona-ba governasaun ne’ebé iha ona no hein kompleta, nune’e ita nia nasaun ne’e sempre la’o nafatin ba oin. Ita nunka lori nasaun ne’e hakiduk fali ba kotuk. Bainhira ita laiha Governu no mós instituisaun sira ne’e, entaun anarkia bele mosu. Tanba, sé mak atu rona sé,” dehan Vidál de Jesus ‘Riak Leman’ ba jornalista sira, hafoin hamutuk no ninia estrutura, hasoru malu ho Xefe Estadu Francisco Guterres Lú Olo, iha Palásiu Prezidente Nicolau Lobato, Bairru Pité, Dili, segunda ne’e.

Riak Leman hateten, CCLN mós iha esperansa no garante katak VIII  Governu ne’ebé hamriik ona, sei halo duni ninia knaar atu implemeta ninia planu sira, liuliu atu dezenvolve rai no povu ida-ne’e.

“Di’ak hela, tanba ita-nia Governu ne’e agora komesa atu la’o ona. Membru sira balun mak sei hein Prezidente Repúblika atu fó pose, no kuandu simu ona pose, entaun ida-idak bele hala’o ninia knaar hanesan baibain,” nia dehan. 

Entretantu, Prezidente Repúblika liuhosi Dekretu Prezidente, númeru 39/2020, iha loron 29 fulan maiu tinan ne’e, nomeia no fó pose ba Vise Primeira-Ministra Armanda Berta dos Santos, Ministru ba Prezidénsia Konsellu Ministru Fidelis Manuel Leite Magalhāes, Ministru ba Assuntu Parlamentares no Komunikasaun Sosiál, Francisco Martins da Costa Perreira Jerónimo, Ministru Finansas Fernando Hanjam, Ministru Administrasaun Estatal Miguel sPereira de Carvalho, Ministra Saúde Odete Maria Freitas Belo, Ministru ba Assuntu Kombatentes Libertasaun Nasionál Júlio Sarmento da Costa ‘Meta Mali’, Ministru Agrikultura no Peskas Pedro dos Reis.

Iha loron 25 fulan maiu, Prezidente Repúblika promulga Lei Orgániku foun VIII Governu Konstitusionál. Iha Lei Orgániku foun, Primeiru Ministru sei koadjuva husi Vise Primeiru Ministru na’in-rua. Kada Vise  Primeiru Ministru ida sei akumula funsaun Ministru Planu no Ordenamentu no Ministru Solidariedade Sosiál no Inkluzasaun.

Ministru sira ne’ebé sei integra ba VIII Governu Konstitusionál: Ministru da Prezidénsia Konsellu Ministru, Ministru Koordenadór ba Assuntu Ekonómiku, Ministru ba Assuntu Parlamentar no Komunikasaun Sosial, Ministru Finansas, Ministru Negósiu Estranjeiru no Kooperasaun, Ministru Justisa, Ministru da Administrasaun Estatal, Ministru Saúde, Ministru Edukasaun Juventude no Desportu, Ministru Ensinu Superior, Siénsia no Kultura, Ministru Solidariedade Sosial no Inkluzasaun, Ministru ba Assuntus Kombatentes Libertasaun Nasionál, Ministru Planu no Ordenamentu, Ministru Obras Públikas, Ministru  ba Transportes no Komunikasaun, Ministru Turizmu, Komérsiu no Indústria, Ministru Agrikultura no Peskas, Ministru Defeza, Ministru Interiór, Ministru Petróleu no Minerais.

Ministru sira sei koajuva hosi Vise-Ministru Negosiu Estranjeiru no Kooperasaun, Vise-Ministru  Justisa, Vise-Ministru Estatál, Vise-Ministru ba Kuidadu Saúde Primária, Vise-Ministru ba Dezenvolvimentu Estratéjiku Saúde, Vise-Ministru Edukasaun, Juventude no Desportu,  Vise-Ministru Solidariedade Sosiál, Vise-Ministru Obras Públika, Vise-Ministru ba Turizmu Komunitária no Kulturál, Vise-Ministru Komérsiu no Indústria, Vise-Ministru Interiór,  Sekretáriu Estadu Kooperativa, Sekretáriu Estadu ba Ambiente, Sekretáriu Estadu ba Komunikasaun Sosiál, Sekretáriu Estadu ba Teras no Propriedade, Sekretáriu Estadu ba Juventude no Desportu, Sekretáriu Estadu Arte no Kultura, Sekretáriu Estadu ba Assuntu Kombatente Libertasaun Nasionál, Sekretáriu Estadu ba Peska, Sekretáriu Estadu ba Protesaun Sivíl no Sekretáriu Estadu ba Igualdade no Inkluzaun.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here