Xanana Gusmão halo lansamentu ba biblioteka movel ho motór roda tolu (Tum-Tum). Imajen Tatoli/Florêncio Miranda Ximenes

DILI, 20 Juñu 2020 (TATOLI) – Líder Karizmátiku, Kay Rala Xanana Gusmão hamutuk ho Sala Leitura, Xanana Gusmão Reading Room halo lansamentu ba biblioteka movel ho motór roda tolu (Tum-Tum) no iha tempu hanesan selebra mós tinan 20 Sala Leitura ne’e.

Eis Prezidente Repúblika ne’e husu atu joven sira kontinua aproveita Sala Leitura hodi labele halakon kultura lee iha Timor-Leste.

“Sala Leitura ne’e inistiva husi Cristy Sword Gusmão hodi impresta ha’u nia naran de’it maibé Cristy mak servisu, tanba nia hanesan feto ida ne’ebé sensebilidade sosiál maka’as,” tenik Xanana Gusmão bainhira lansa biblioteka movel ne’e, Xanana Gusmão Reading Room, Bidau Lecidere, sábadu ne’e.

Nia haktuir, edifísiu ne’e uluk hanesan fatin Konsuladu Indonézia no iha tinan 2000 mak iha inisiativa hodi muda ba Sala Leitura hodi fó kapasitasaun ba joven sira ne’ebé hakarak hamoris kultura lee iha Timor-Leste.

“Joven sira presiza aproveita estuda buat barak hodi kontribui ba dezenvolvimentu nasionál. Ita lee ne’e importante, ne’ebé husu atu ita hotu tenke lee hahú husi labarik to’o joven sira, ne’ebé sei uza biblioteka tun-tum ne’e atu vizita eskola sira nune’e estudante sira bele lee”, Xanana apela.

Iha tinan 1999, bainhira Cristy Sword Gusmão foti inisativa harii Alola Foundation tanba feto hamutuk 118 mak kankru susu iha momentu ne’ebá.

Nune’e mós, iha tinan 1999, bainhira milísia estraga feto ida iha Suai, feto ne’e naran iha uma ema bolu ‘Alola’ ne’ebé Cristy mós hanoin kedan harii Alola Foudation atu defende feto sira.

Ministra Edukasaun Juventude no Desportu demisionária, Dulce de Jesus mós fó sertifikadu apresisaun ba fundadora Cristy Sword Gusmão tanba ho inistiva kria fatin ida hodi kontribui ba dezenvolvimentu edukasaun iha Timor-Leste.

“Ami hato’o parabéns no obrigado barak tanba Mana Cristy la baruk no kontinua apoia dezenvolve edukasuan iha Timor-Leste,” Ministra Dulce agradese.

Fundadora Xanana Gusmão Reading Room, Cristy Sword Gusmão liuhosi telekonférénsia hato’o obrigadu ba apoiu tomak husi Governu no sidadaun sira, liuliu ba estutura atuál Sala Leitura tanba ho korajen no vontade maka’as eziste ona durante tinan 20.

“Ha’u espera liuhosi fatin ne’e bele transforma labarik, joven no sidadaun hotu atu hametin kultura lee iha Timor-Leste,” nia afirma.

Iha sorin seluk, Diretór Xanana Gusmão Reading Room, Gaspar Freitas Kassa promete iha selebrasaun aniversáriu ne’e prontu atu fó kapasitasaun ba joven sira liuhosi atividade formasaun ho gratuita hodi bele iha koñesimentu atu dezenvolve nasaun ne’e.

Formasaun ne’e, nia dehan iha área téknika, enjeñeiru, administrasaun, finansa no fasilita vizitante sira atu lee livru sira ne’ebé kuaze ema rihun mak asesu ona.

Serimónia ne’e partisipa husi Premiadu Nobel ba Dame, José Ramos Horta, korpu diplomátiku, setór privadu Timor-Leste no eis membru governu sira.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here