Sekretáriu Estadu Protesaun Sivíl, Alexandrino de Araújo. Imajen /Egas Cristovão

DILI, 19 juñu 2020 (TATOLI) – Sekretária Estadu Protesaun Sivíl (SEPS) fó ona apoiu emerjénsia ba família vítima dezastre naturaís  hamutuk 1031 iha kosta súl no rejiaun leste.

Familia vítima sira ne’e afetadu ba dezastre anin no udan-boot, foin lalais ne’e.  Nune’e, SEPS rejista família vítima iha territóriu tomak hamutuk 2194 ne’ebé bee tama sira-nia uma no anin sobu sira-nia uma.

Liuhusi konferénsia imprensa, ohin, iha edifísiu SEPS, Caicoli, Dili, Sekretariu Estadu Protesaun Sivíl, Alexandrino Araújo Xavier, informa katak família 1031 mak hetan ona apoiu emerjénsia no hela família 1163 mak seidauk hetan apoiu.

Distribuisaun umanitária hanesan hahán no sasán (food no non food items) kompostu husi foos, mina, ikan lata, supermi, sana, bikan, lona no seluk tan.

Vítima sira ne’ebé  SEPS rejista   kompostu husi munisípiu Covalima iha família vítima (323), Manufahi (505), Viqueque (839), Manatuto (513), Baucau (4) no Lautem família vítima hitu (7).

“Agora ita kontinua hela distribui apoiu emerjénsia ba uma-kain sira ne’ebé mak seidauk hetan,” Alexandrino Araújo Xavier hateten.

SEPS mós mobiliza hotu ona hahán no sasán emerjénsia sira ne’e husi Dili ba iha armazén iha munisípiu hodi kontinua fó apoiu lalais ba vítima sira.

SEPS Alexandrino Araújo Xavier afirma, ekipa SEPS halo hela verifikasaun hodi hatene tipu estragu ba família sira-nian iha dezastre ne’e. Atu  nune’e, sira bele  hetan apoiu rekuperasaun iha tempu oin mai.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here