Representante UNICEF iha Timor Leste entrega Fasilidade ekipamentu ba Jestor iha Merkadu Manleuana hodi komunidade sira uja prevene COVID 19. Imajen/Antonio Goncalves

DILI, 19 juñu 2020 (TATOLI)-Governu liuhosi Ministériu Saúde apela ba Negosiante sira iha Merkadu Manleuana atu kuidadu ekipamentu prevensaun surtu COVID-19 ne’ebé maka Uniaun Europeia ho UNICEF instala ona iha fatin ne’ebá.

Xefe Departamentu Saúde Ambientál, Ministériu Saúde hateten tanke bee moos ne’ebé instala proibidu atu konsume maibé rekomenda atu uza hodi fase liman.

”Ha’u rekomenda ba komunidade sira iha Manleuana katak tanke bee-moos ne’ebé mak estabelese husi Uniaun Europeia ho UNICEF  ne’e la’ós atu konsume no la’os atu fase modo maibé ba fase liman nian,” dehan nia hafoin partisipa serimonia lansamentu iha Manleuana, ohin.

UNICEF ho UE instala tanke bee moos ka profile tolu kompleta ho torneira no sabaun ba negosiante hodi tulun sira atu fase liman bebeik ba prevensaun COVID-19.

” Bee ne’ebé mak supa husi posu ne’e mai iha kontamisaun baktéria no mós iha virus tanba ne’e mak ami husu ba komunidade Manleuana no iha merkadu ne’e labele konsume bee ne’e rasik tanba risku boot ba moras diarea,”nia tenik tan.

Tuir planu Sentru Saúde Comoro maka sei toma konta hodi halo monitorizasaun ba fasilidade no hijiéne iha Merkadu Manleuana.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here