Reitór Universidade Nasionál Timor Lorosa’e (UNTL), Francisco Miguel Martins. Imajen/TATOLI Egas Cristovao

DILI, 18 juñu 2020 (TATOLI)-Reitór Universidade Nasionál Timor Lorosa’e (UNTL), Francisco Miguel Martins, hateten parte universidade hasai ona desizaun hodi anula (elimina) tiha ona propinas ba estudante sira durante implementasaun Estadu Emerjénsia.

Desizaun hodi aplika ijensaun propinas ba estudante UNTL ne’e aprenzenta ona ba Ministériu Ensinu Superiór Siénsia no Kultura (MESSK) hodi konsidera.

“Asaun ida ne’ebe ami-nia estudante sira halo iha kuarta 17/06 ne’e ha’u konsidera tarde tiha ona tanba asuntu sira ne’e ita anula tiha ona, signifika preokupasaun sira ne’e universidade aprezenta hotu ona ba Ministru, no agora ita hein de’it resposta,” dehan Reitór UNTL ba TATOLI, iha ninia servisu fatin ohin.

Nia dehan tuir loloos antes atu halo konferénsia imprensa ba públiku, estudante sira presiza konfirma lai asuntu ne’e ho parte universidade hodi hetan esplikasaun klaru.

Ho faillansu ne’e maka iha kinta ne’e, reprezentante estudante sira na’in tolu ba hasoru Reitór hodi husu deskulpa.

Maibé nia tenik tan, MESSK mak tenki foti desizaun  ikus kona-ba aplikasaun propinas presiza atu kontinua selu ka kansela.

Entretantu, Estudante UNTL iha kuarta ne’e halo konferénsia imprensa ida hodi ejize ba parte Reitorál atu kansela propinas $ 30 durante implementasaun Estadu Emerjénsia ligadu ho moras coronavirus iha Timor-Leste.

Jornalista : Tomé Amado  

Editór       : Agapito dos Santos

HAKEREK NO HATÁN

Please enter your comment!
Please enter your name here