Logotipu ANAAA

DILI, 18 juñu 2020 (TATOLI)-Ministru Ensinu Superiór Siénsia no Kultura (MESSK), Longuinhos dos Santos, kinta ne’e fó tan pose ba Prezidente Ajénsia Nasionál Avaliasaun Akreditasaun Akadémika (ANAAA) Samuel Freitas, ba periodu daruak nian 2020 to’o 2022.

Prezidente Emposadu ne’e simu pose periodu dahuluk nian iha tinan rua liubá hahú 2018 to’o 2020.

“Ha’u sente onradu bo’ot ba konfiansa ida ne’e, mandatu ne’ebé ha’u simu ba periodu dahuluk tinan rua ramata ona, maibé ita boot sira kontinua fó mai ha’u periodu ida tan hodi lidera ANAAA ba 2020-2022,”dehan nia durante serimonia simu pose iha salaun Ian Martin INFORDEPE Matadouro, kinta ne’e.

Iha Deskursu Samuel, hateten previlejiu ba ANAAA hodi ejerse ninia funsaun maka halo avaliasaun no fó akreditasaun ba Instituisaun Ensinu Superiór Privada no Públiku hodi hadia nafatin kualidade edukasaun iha Timor-Leste.

Iha mandatu dahuluk nian, Prezidente ANAAA ne’e halo ona esforsu hodi lori Instituisaun Ensinu Superiór sira ba atinje metas edukasaun ida ho kualidade no garante atividade no kursu sira iha nivel preparasaun idak di’ak liu.

“Ha’u sei kontinua tinan rua tan hamutuk ho ita bo’ot sira, ha’u espera ita hotu kontinua apoiu malu hodi lori futuru ida di’ak ba rai ida ne’e liuhusi kualidade atu garante jerasaun foun sira ninia vida,”nia hateten.

Nia hatutan Instituisaun Governu nian ne’e kontinua ejiste tanba akumula matenek na’in sira husi Instituisaun Ensinu Superiór Privada no Públika hanesan UNTL, IOB, UNITAL, MESSK, INDMo, FDCH no seluk tan.

Iha biban hanesan Ministru Ensinu Superiór Siénsia no Kultura (MESSK), Longuinhos dos Santos hateten,  ho Prezidente Emposadu ne’e sei tulun Governu liliu MESSK hodi implementa polítika ida maka garante no hasa’e kualidade edukasaun ba Ensinu Superiór sira.

“Nu’udar membru Governu kontinua fó nafatin apoiu tomak ba ANAAA liliu Prezidenti Samuel ne’ebé eleitu filafali ba tinan rua ne’e bele aselera liutan avaliasaun ida rigorozu  hodi hetan kualidade iha instituiusan sira,”katak Governante.

Jornalista : Tomé Amado  

Editór       : Agapito dos Santos

HAKEREK NO HATÁN

Please enter your comment!
Please enter your name here