Primeiru-Ministru, Taur Matan Ruak, hafoin fó pose ba membru Komisaun Elaborasaun Planu Rekuperasaun Ekonómika iha Salaun PCM, Palásiu Governu, kinta (18/06). Imajen Tatoli/António Gonçalves

DILI, 18 juñu 2020 (TATOLI) – Primeiru-Ministru (PM), Taur Matan Ruak, fó pose ba estrutura Komisaun Elabora Planu Rekuperasaun Ekonómika, ne’ebé kompostu husi Prezidente Komisaun, Rui Augusto Gomes no ninia vogál na’in-haat maka Rui Maria de Araújo, Manuel Vong, Carlos da Silva Lopes Saky, no Berta Montalvão.

Kriasaun komisaun ne’e bazeia ba Projetu Rezolusaun Governu, ne’ebé aprezenta husi Xefe Governu iha reuniaun ordinária Konsellu Ministru iha 10 juñu no hetan ona aprovasaun.

Iha seremónia pose, PM Taur espera ekipa ne’e bele define prioridade hodi rekupera hikas ekonomia rai-laran no hasa’e kresimentu ekonómiku hafoin pandemia COVID-19 no iha tempu hanesan konsidera kriasaun komisaun ne’e hodi hetan konsensu iha investimentu.

“Razaun kria komisaun ne’e hodi hetan mínimu konsensu posível iha sosiedade, define prioridade klaru tanba ita hanoin katak nesesáriu atu halo investimentu, rekursu oituan ne’ebé ita iha tenke barani investe tanba ita hakarak normaliza filafali ita-nia ekonomia iha rai-laran,” tenik iha Salaun Prezidénsia Konsellu Ministru (PCM, sigla portugés), Palásiu Governu, kinta ne’e.

Primeiru-Ministru, Taur Matan Ruak. Imajen Tatoli/António Gonçalves

Servisu komisaun ne’e durante loron-60 hodi prepara planu ba rekuperasaun nian, nune’e elaborasaun planu bele aprezenta ba Konsellu Ministru.

Iha ámbitu ne’e, Xefe Governu fó hanoin ba ekipa ne’e halo diagnóstika hodi haree Timor-Leste nia faze, tendénsia mundiál, nasionál no rejionál.

“Iha médiu prazu bele haree oinsá maka mundu funsiona no Timor-Leste bele integra nia-an ein termu ekonómiku atu haree pasu saida mak sei hola iha futuru. Ha’u-nia Governu disponível apoia ita bo’ot sira tuir posibilidade ne’ebé iha no espera iha tempu badak bele hetan planu ida ne’e,” nia akresenta.

Taur nota, Governu hotu ne’ebé liu ona halo esforsu boot atu kria kondisaun ba povu atu hetan buat importante hanesan vida naruk no saudável, koñesementu teknolojia no inovasaun husi adapta ita nia-an ba evolusaun mundu nian, no padraun vida di’ak no dignu.

Tuir PM presiza konsentra hasa’e rendimentu sidadaun no kombate dezigualdade sosiál no rejionál, tanba ne’e Governu sei konsentra ba área importante hanesan sosiál ne’ebé foku ba igualdade oportunidade no asesu ba servisu públiku sira, ekonómika ko’alia kona-ba produtividade, kresimentu no empregu, infraestrutura foku ba konetividade, kompetividade no integrasaun nasionál, internasionál, no rejionál.

Nune’e mós hadi’a infraestrutura iha área hotu hanesan estrada, aeroportu, portu no komunikasaun, no institusionál presta servisu ida efisiente ba sidadaun sira, kria ambiente negósiu di’ak,kria kondisaun ba sidadaun sira hodi bele fó kontribuisaun atu partisipa iha dezenvolvimentu nasaun nian.

Enkuantu ba área ambientál, Timor-Leste konsentra iha uzu rekursu ne’ebé utiliza téknolojia amigável ambiente ho nia tranzisaun ba ekonomia verde, maski iha situasaun surtu la fásil kontinua dependente ba fundu petrolíferu.

Primeiru-Ministru, Taur Matan Ruak, dada-lia ho Vogál Komisaun Elabora Planu Rekuperasaun Ekonómiku, Rui Maria de Araújo no Berta Montalvão, iha Salaun PCM, Palásiu Governu, kinta (18/06). Imajen Tatoli/António Gonçalves

Xefe Governu akompaña diskusaun katak iha espekulasaun probabilidade sei iha kresimentu negativu husi porsentu lima to’o neen, tanba ne’e presiza agrupa senáriu rua impotante iha modelu rekuperasaun maka ida ótimista pesimista.

Aleinde ne’e, Timor-Leste enfrenta dezastre naturál dala-rua ne’ebé kuaze kontabiliza hamutuk millaun $50-resin hodi normaliza bens públiku no abitante afetadu.

Tanba ne’e, PM taur subliña daudaun ne’e Governu fó atensaun maka’as ba impaktu sosiál no medida ekonomika, ne’ebé prevee ona millaun $142-resin no sei esforsu ba implementasaun no ezekusaun duodesimál atu labele tun liu, nune’e iha faze tuirmai bainhira iha rekuperasaun no kresimentu la presiza halo esforsu boot ona maibé oitoan hodi bele ajuda hasa’e nível seluk.

“Iha planu estabilizasaun enkuantu Governuhalo ezekusaun, iha hanoin ba planu rekuperasaun no deside forma ekipa ho partisipasaun hodi prepara ita-nia planu rekuperasaun no kresimentu ne’e,” nia akresenta.

Iha sorin seluk, PM Taur fó orientasaun ba membru Governu sira hodi foku ba mantein reforsa ne’ebé planea iha 2019, redúz burokrasia no seluk ne’ebé halo Governasaun ne’e todan.

Nune’e mós, área ida foku ba produtividade no empregu tanba investimentu tinan barak konsentra iha empregu, liuliu iha kapitál dezenvolvimentu produtividade, Taur konsidera iha neglijénsia oituan.

“Ikus liu mak reforsa kapasidade reziliénsia tanba foin daudaun iha setór saúde kuandu COVID-19 ita halai tun sa’e buka fatin ne’e hatudu katak la preparadu ba krize maibé la’ós de’it sistema saúde maibé mós iha área edukasaun, seguransa ai-han no área sira seluk ne’ebé presiza reforsa atu aumenta kapasidade atu rejiste iha momentu krize”, nia salienta.

Seremónia ne’e akompaña mós husi Ministru ba Prezidénsia Konsellu Ministru no Ministru Koordenadór Asuntu Ekonómiku interinu, Fidelis Manuel Leite Magalhães no Ministru Asuntu Parlamentár no Komunikasaun Sosiál, Francisco Jerónimo.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here