Dr Rajesh Pandav, Reprezentante OMS ba Timor-Leste.

DILI,18 juñu 2020 (TATOLI)-Reprezentante Organizasaun Mundiál Saúde (OMS) iha Timor-Leste, Rajesh Pandav, hateten OMS sei kontinua apoiu Governu liuhosi Ministériu Saúde hodi dezenvolve rekursu umanu nune’e bele presta servisu ba populasaun ho kualidade ba atinje kobertura saúde universal.

Rajesh Pandav, dehan kompromisu ne’e bainhira partisipa serimonia lansamentu Planu Estratéjiku Nasionál Dezenvolvimentu Umanu Seitór Saúde periodu 2020-2024 iha Otél Novo Turizmu, ohin.

“Ha’u garante katak hanesan Organizasaun Mundiál Saúde komprometidu atu servisu hamutuk ho Ministériu Saúde atu ita bele harii rekursu umanu iha setór saúde ne’ebé ho kualidade aas hodi bele ajuda ita atinji kbertura saúde universál, no lori ita lalais ba meta relasionadu ho saúde hosi objetivu dezenvolvimentu sustentavel no garante katak ita atinje saúde di’ak ba ema hotu, iha kualkér fatin Timoroan saudavel iha Timor-Leste ne’ebé saudavel,”katak Pandav.

Nia observa katak MS iha rekursu umanu ida forte tanba iha tinan hirak ikus ne’e númeru médiku, enfermeiru, parteira no pesoál saúde sira seluk kontinua aumenta maka’as.

“Ministériu Saúde nia programa furak Saúde na Família hodi garante katak ema ki’ak no marjinalizadu sira inklui mós iha servisu saúde ida ne’e no Timor-Leste nia kompromisu ba provizaun konstitusionál hodi forñese servisu saúde gratuita iha fasilidade saúde hotu,” Rajesh Pandav apresia.

Mezmu nune’e MS sei enfreta problema maka hadi’a kualidade servisu pesoál saúde sira-nian atu atende pasiente sira ho profesionalismu tuir méritu ne’ebé maka iha.

“Ita agora iha perigu nia laran tanba sai vitima ba ita-nia susesu rasik se ita la utiliza númeru doutór, enfermeiru no parteira sira ne’ebé ita prodús ona,”nia hateten.

Jornalista : Felicidade Ximene

Editór       : Agapito dos Santos

HAKEREK NO HATÁN

Please enter your comment!
Please enter your name here