Ministru Defeza no Seguransa no Ministru Interiór interinu, Filomeno da Paixão de Jesus. ImajenTatoli/Egas Cristovão

DILI, 17 juñu 2020 (TATOLI) – Atu kontrola rikusoin iha Tasi Timór, liuliu kombate peska ilegál sira, Governu iha ona hanoin atu prevee osan iha Orsamentu Jerál Estadu (OJE) 2021 hodi sosa ró boot ida atu halo operasaun ba iha área tasi badak no naruk inklui tasi fuik ka laloron boot mós bele.

Ministru Defeza no Seguransa no Ministru Interiór interinu, Filomeno da Paixão de Jesus hateten iha proposta OJE 2020 Governu liuhosi Ministériu Defeza no Seguransa (MDS) hamutuk ho Ministériu Agrikultura no Peska (MAP) prevee ona atu sosa ró boot, maibé la konsege realiza tanba orsamentu la pasa.

“Uluk ita prevee ona iha OJE 2020 ho millaun $3-resin, maibé orsamentu ne’e sumba iha Parlamentu Nasaionál ne’ebé atu aprezenta fali OJE 2020 tan maibé la biban ona tanba kestaun ezekusaun,” tenik Ministru Filomeno iha Palásiu Governu, kuarta ne’e.

Tuir dadus husi MAP ne’ebé asesu liuhosi satelit katak hahú husi 2018 to’o 2019, iha ró unidade 170 maka tama ilegál iha Tasi Timór.

“Tinan oin ita presiza prevee duni osan atu sosa ró boot tanba agora ita iha ró ki’ik sira husi Komponente Navál no Martítima, maibé laiha kapasidade atu halo operasaun iha Tasi Mane,” nia subliña.

Antes ne’e, Diretór Jerál Peska Ministériu Agrikultura no Peska (MAP), Acacio Guterres, informa esforsu ne’ebé Diresaun Peska halo atu kombate ró tama ilegál maka normalmente servisu hamutuk ho komponente Navál no Polisía Marítima.

Ho nune’e, Diretór ne’e iha epseransa MAP bele tau prioridade ba kestaun peskál ilegál no bele fó apoia másimu ba komponente rua ne’e atu kontrola másimu iha tasi.

Tuir Dirijente ne’e, MAP iha ona planu ne’ebé atu tau iha orsamentu 2021 hodi bele sosa ró ne’e atu asegura no kontrola rikusoin iha tasi laran.

Jornalista: Florêncio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here