Embaxadór Nova Zelandia iha Timor-Leste (TL), Phillip Hewit. Imajen/Mídia PR.

DILI, 17 juñu 2020 (TATOLI)–Governu Nova Zelandia liuhosi ninia embaxadór  iha Timor-Leste (TL), Phillip Hewit, apresia no kongratula estadu Timor-Leste ne’ebé susesu hodi halo prevensaun ba surtu Coronavirus (COVGID-19) ne’ebé to’o ohin loron livre hosi kazu konfirmadu.

Embaxadór Phillip Hewit  hato’o apresiasaun ne’e hafoin hasoru malu ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairrupité, Dili.

“Iha sorumutuk ho Prezidente Repúblika, ohin, kongratula Estadu Timor-Leste tanba susesu responde COVID-19 no husu atu kontinua vizilante. Kongratulasaun hosi Governu Nova Zelandia ba Estadu tanba to’o ohin loron Timor-Leste laiha kazu konfirmadu ho COVID-19,” Phillip Hewit hateten ba jornalista sira, kuarta ne’e. 

Nia hateten, Timor-Leste ho Nova Zelándia nu’udár nasaun rua hosi sira seluk ne’ebé susesu iha luta hasoru moras Coronavirus, maibé infelizmente Nova Zelándia foin horisehik deklara iha kazu foun rua.

“Timor-Leste tenke kontinua vizilante ho COVID-19, tanba seidauk hatene bainhira mak moras Coronavirus ne’e lakon iha mundu,” nia apela.

Embaixadór Phillip Hewit informa, Nova Zelándia haforsa kompromisu Nova Zelandia nian atu kontinua suporta no servisu hamutuk Timor-Leste iha luta hasoru COVID-19.

“Governu Nova Zelándia, desde fulan marsu fó apoiu ba Timor-Leste halo repatriasaun estudante na’in-17 hosi Wuhan, episentru COVID-19, instalasaun fase-liman ba organizasaun sosiedade sivíl, Ministériu Edukasaun, Juventude no Desportu, fornese ekipamentu protesaun pesoál ba Ministériu Saúde, PNTL no F-FDTL,” nia dehan. 

Alende ne’e, nia hatutan, Nova Zelándia sei apoiu Timor-Leste ninia adezaun ba ASEAN no WTO, diversifikasaun ekonomia liuhosi suporta kafe, cocoa, turizmu, peskas, edukasaun infantil no polisia komunitária.

Governu Nova Zelándia nia apoiu ba Timor-Leste hahú hosi 2018 to’o 2021 mak ho montante millaun $45.17 ba finansiamentu programa.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here