Xefe Estadu Maior Jenerál FALINTIL-Forsa Defeza Timor-Leste, Majór Jenerál Lere Anan Timur. Imajen/Antonio Goncalves.

DILI, 17 juñu 2020 (TATOLI)–Xefe Estadu Maior Jenerál FALINTIL Forsa Defeza Timor-Leste (F-FDTL), Majór Jenerál Lere Anan Timur, konsidera lei difamasaun ne’ebé oras ne’e Governu fó tempu ba sosidade atu diskute, ne’e importante atu bele hamate ema tolok arbiru.

Lere hato’o asuntu ne’e, hafoin hala’o ekontru semanál ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pité, Dili.

“Kona-ba lei difamasaun, iha balun kontra no balun pró. Ha’u hanoin katak lei difamasaun la signifika bandu ka hamate Liberdade espresaun maibé hamate liberdade ema tolok arbiru. Ida-ne’e mak ha’u hanoin ita tenke komprende,” Lere hateten ba jornalista sira, kuarta ne’e.

Lere hateten, nu’udár timoroan ne’ebé moris iha demokrasia nia laran, buat ne’ebé importante mak tenke buka respeita malu, tanba ne’e tenke kriminaliza difamasaun.

“Ha’u honain katak, ida-ne’e la todan ida. Uluk ami iha ai-laran, ema Indonézia mak tolok ha’u, tolok Kay Rala Xanana Gusmão, no lider rezisténsia sira seluk tan. Ohin loron prova hatudu katak sira mak kontinua tolok ami. Hanesan foin lalais ida tolok ha’u, tolok Prezidente Repúblika, tolok Primeiru Ministru, ne’e la’ós ema seluk, ne’e ninia aman ema forsa armada boot Indonézia nian ne’ebé mate ona no hakoi iha Indonézia ne’eba. Ha’u atu dehan de’it katak ema sira ne’ebé uluk la gosta ami, to’o agora sira mak la gosta nafatin ami no sira mak tolok ami. Ida-ne’e mak ami ko’alia ho Prezidente Repúblika no buat seluk laiha,” nia esplika.

Lider másimu forsa armada ne’e hatutan, kriminaliza lei difamasaun ne’e hanesan forma edukasaun ida ne’ebé ema timoroan labele hanoin katak liberdade espresaun ne’e hanesan liberdade hodi tolok ema arbiru de’it.

“Ezemplu, bainhira ita tolok ema ne’e sala ka la’e. Primeiru, ita nu’udár ema Katóliku, ita nu’udár sarani, Maromak dehan labele tolok ema, nusa mak ita tolok. Segundu, ita moris iha demokrasia no liberdade nia laran maibé iha ninia limitasaun no ita labele ultrapasa. Tanba, bainhira ita tolok ona ne’e la’ós ona liberdade no demokrasia,” Lere subliña.

Antes ne’e, Primeiru Ministru (PM), Taur Matan Ruak, hateten Governu no Konsellu Ministru to’o oras ne’e seidauk simu esbosu lei Kriminaliza Difamasaun, tanba Xefe Governu ne’e rasik hakarak atu fó tempu ba sosiedade hodi diskute.

Alende ne’e, Ministru Justisa, Manuel Cárceres da Costa, klarifika katak, intensaun Governu daualu prodús esbosu Lei Kriminaliza Difamasaun, hanesan meiu-ida atu eduka sosiedade Timor-Leste hodi respeita malu no respeita ema seluk nia onra no integridade pesoál.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here