Logo UNTL.

DILI, 17 juñu 2020 (TATOLI)-Estudante Universidade Nasionál Timor Lorosa’e (UNTL) la satisfas ho desizaun husi parte retoriál tanba kontinua aplika propinas $ 30 ba estudante sira durante implementasaun Estadu Emerjénsia.

“Relasiona ho rezistrasaun ba propinas ida ne’e, ami estudante sira la konkorda tanba durante fulan-tolu Estadu Emerjénsia hodi prevene COVID-19 halo atividade barak mak paradu liu-liu ami-nia inan-aman sira mós la hetan rendimentu ne’ebé másimu,”preokupa Portavós Laura Adelaide Pereira liuhosi konferénsia imprensa, iha Kampus UNTL Caicoli Dili, ohin.

Durante implementasaun EE, nia esplika prosesu aprendijazen uza sistema online la másimu ba estudante sira ho rajaun estudante barak hela iha área remotas, laiha osan sosa saldu no kestaun ekonomia seluk tan.

“Durante fulan tolu prosesu aprendijazen aplika online ne’ebé lá sai alternativa ba ami estudante maioria tanba nesesidade ekonomia lá sufisiente atu hola pulsa hodi asesu internet, rede internet mós susar tebes mai ami tanba barak mak evakua ba ida-idak nia munisípiu iha liu área rural ida mós ami-nia inan-aman sira mós osan lá to’o atu sosa telemovel android hodi asesu internet,” nia esplika.

Tuir nia desizaun Governu hodi oferese subsídiu ba estudante Timoroan iha rai-liur hamosu diskriminasaun hasoru estudante Timoroan sira iha rai-laran.

“Konstituisaun RDTL, iha artigu 16 no 59 ko’alia kona-ba universalidade, igualdede no edukasaun, haree ba maluk sira ne’ebé estuda iha rai-li’ur hetan subsídiu husi governu, oinsá ho ami estudante sira ne’ebé mak  iha rai-laran ne’ebé hasoru difikuldade hanesan ho sira,” nia lamenta.

“Ami husu ba Ministériu Ensinu Superiór Siénsia no Kultura atu haree urjente ami estudante UNTL nia prosesu selu propinas ne’e, ami mós husu ba Konsellu Ministru atu foti medida urjente hodi fó solusaun mai ami estudante sira, nune’e bele normaliza fali prosesu aprendizajen,” nia sujere.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here