Sekretáriu Estadu Terras no Propriedades Mário Ximenes. Imajen/TATOLI

DILI, 17 juñu 2020 (TATOLI) – Arrenditáriu hamutuk na’in-4225 ne’ebé utiliza patrimóniu movies no imoveis Estadu nian la kumpre obrigasaun hodi selu arrendamentu ba Estadu.

Rai no uma ka edifísiu públiku ne’ebé pertense ba Estadu nian ne’ebé Ministériu Justisa liuhusi Sekretária Estadu Terras no Propriedade (SETP) administra halo kontratu ho ema individual, emprezáriu no seluk hodi utiliza hela ka hala’o atividade ruma, maibé  arrendatáriu hirak-ne’e la kumpre sira-nia obrigasaun.

Ba Agência Tatoli, ohin, iha edifísiu SETP, Colmera, Dili, Sekretáriu Estadu SETP Mario Ximenes, hateten dadus SETP daudaun ne’e rejista 8340-resin arrendatáriu iha territóriu maka hala’o kontratu ne’ebé utiliza patrimóniu estadu, tanba ne’e depende tuir kontratu hodi selu arrendamentu kada fulan ba Estadu.

Nia tenik tan, iha arrendatáriu 4115 mak selu ativu no 4225-resin mak la kumpre selu desde iha tinan 2017 to’o 2020.

“Ita rejista kuaze 4225-ital arrendatáriu mak la selu arrendamentu, hahú iha tinan 2017 to’o mai 2020. Husi númeru ne’e, ita konta reseita millaun $4 mak la konsege selu,” informa Mario Ximenes.

Sekretária Estadu Terras no Propriedade (SETP) rekolla ona reseita liuhusi arrendamentu proprietáriu moveis no imoves konsege rekolla ona reseita iha 2018 millaun $3-resin no millaun $4 iha 2019.

Sekretáriu Estadu SETP, Mario Ximenes, hateten razaun arrendatáriu sira la selu tanba ho situasaun polítika rai-laran ne’ebé dezde hahú 2017 to’o mai iha krize sanitária COVID-19 ne’ebé prejudika ekonomia la estavel no laiha rendimentu hosi arrendatáriu sira nune’e atraza la selu.

“Ita nia maluk arrentáriu hanesan emprezáriu no sira seluk tan hato’o pedidu mai Governu katak ho situasaun la admite sira atu labele selu, no bele selu tuir fazeadamente no sira husu oinsá redús kustu ne’ebé aplika,” Mario Ximenes hateten.

Haree ba sidadaun sira barak mak la selu taxa ba estadu dezde 2017, Sekretáriu Estadu SETP, Mario Ximenes, hateten sira-nia parte hato’o ona karta xamada.

Ministériu Justisa liuhusi Terras Propriedade mós uza mekanizmu no estratéjia nune’e arrendatáriu hirak ne’ebé seidauk selu tenke kumpre hodi selu.

“Agora depende ita hato’o proposta ba Ministériu Justisa nune’e Ministru bele levanta iha Konsellu Ministru, oinsá rezolve situasaun ne’e,” dehan Mario Ximenes.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here