Kondisaun Aeroportu Suai. Imajen/Espesiál

DILI, 17 juñu 2020 (TATOLI) Ministru Transporte Komunikasaun, José Agostinho da Silva, hateten bainhira haree ba kondisaun Aeroportu Internasionál Comandante em Chefe das FALINTIL, Kay Rala Xanana Gusmão iha Suai, ne’ebé maka nakonu ho animál nia foer, nia parte sei bolu Prezidente Konsellu Administrasaun Ajénsia Nasionál Aviasaun Timor-Leste, Empreza Públika (ANATL, EP), Romualdo da Silva, hodi klarifika asuntu refere.

“Klaru ha’u sei bolu Prezidente ANATL hodi hetan esplikasaun kona-ba asuntu ne’e, nune’e bele buka medida ba oin,” dehan Ministru José Agostinho, iha Palásiu Governu, kuarta ne’e.

Nia parte to’o oras ne’e seidauk simu infomasaun ruma kona-ba kondisaun Aeroportu Suai, tanba ne’e bainhira informasaun klaru sei orienta entidade relevante atu asegura aeroportu ne’e liuliu kona-ba jestaun.

“Ita-nia propriadade Estadu halo investimentu ne’ebé uza osan boot, nune’e kabe ba entidade relevante sira atu asegura nafatin kualidade ijene  aeroportu”, Ministru subliña.

Aeroportu Suai inaugura ona iha loron 20 juñu 2017 husi Prezidénte Repúblika, Francisco Guterres Lú Olo.

Governu lansa voo internasionál dahuluk iha aeroportu ne’e iha loron 28 setembru 2018.

Kompañia australiana, Northern Oil & Gas Australia (NOGA) maka daudaun ne’e halo operasaun hodi transporta rekursu umanu ba atividade plataforma petrolífera iha Tasi Timór.

Kompañia ne’e simu ona autorizasaun espesiál ida hosi Autoridade de Aviação Civil de Timor-Leste (AACTL) hodi asegura no hadi’a daudaun kondisaun seguransa sira ne’ebé importante hodi realiza ligasaun entre Darwin no Suai.

Ligasaun ida-ne’e sei loke dalan atu empreza ne’ebé instala nia baze operasaun iha Suai bele favorese dezenvolvimentu ekonómiku.

Aeroportu Internasionál Suai hahú konstrusaun iha loron 20 Maiu 2014 husi kontratór PT Waskita Karya (Persero),Tbk ho durasaun servisu loron 1.163 no hetan fiskalizasaun husi konsultan Jurutera Perunding Zaaba, ho orsamentu ba projeitu ne’e rasik ho montante $67.691.189,85.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here