DILI, 16 juñu 2020 (TATOLI)-Tuir relatóriu husi Banku Sangue Nasionál HNGV fó sai durante fulan-maiu iha pasiente fase ran kompostu husi feto ho mane hamutuk ema na’in 161 mak presiza hetan doasaun ran barak liu.
Aleinde ne’e pasiente husi sala maternidade inan isin-rua hafoin partus presiza ran hamutuk ema 94, iha sala operasaun hamutuk pasiente 51, iha sala pediatria hamutuk 43, klínika Fatumeta pasiente 39 no Ospitál Referál Baucau hamutuk na’in haat no total pasiente ne’ebé maka presiza ran durante fulan-maiu hamutuk 392.
“Durante doasaun ran husi enfarmaria mak presiza liliu materniddaae inan sira ne’ebé mak foin partus ne’e, Banku Sangue tenki oferese ran ba sira para atu salva sira-nia moris,” informa Xefe Banku Sangue Nasionál, Januario da Cruz Freitas, ba jornalista sira iha ninia servisu fatin HNGV, ohin.
HNGV prepara ran ho tipu haat hanesan A, B, AB no O hodi oferese ba pasiente sira bainhira presiza tebes atu hetan doasaun ran.
”Tanba durante estadu emerjénsia voluntariu sira ne’ebé mak fó ran ne’e menus entaun Banku Sangue halo atividade doasaun ran ne’e iha loron 8 to’o 13 fulan-juñu ,”’nia esplika.
Maski durante semana ida ne’e sei iha estoke ran oituan maibé iha posibilidade iha semana oin Banku Sangue Nasionál sei enfreta problema menus estoke ran tanba laiha voluntariu ne’ebé maka daudaun ne’e hakarak atu oferese ran ho gratuita.
Jornalista : Felicidade Ximenes
Editór : Agapito dos Santos
