Embaxador Jepaun,Kinefuchi Masami hafoin asina akordu ho MNEK, Deonisio Babo,konaba ajuda humanitaria ekipamentu ba prevensaun Virus Corona iha Timor Leste. Akordu nee asina iha salaun MNEK Dili 16 Juinu 2020.Imajen/Antonio Goncalves

DILI, 16 juñu 2020 (TATOLI)-Embaixadór Japaun iha Timor-Leste, Kinefuchi Masami, tersa ne’e asina nota intendimentu ida (MoU-sigla inglés) ho Governu liuhosi Ministru Negósiu Estranjeiru no Kooperasaun Demisioner, Dionísio da Costa Babo Soares hodi fó apoiu osan millaun $ 4.6 ba prevene no kombate transmisaun surtu COVID-19 iha Timor-Leste.

Nota kooperasaun ne’e asina iha edifísiu Ministériu Negósiu Estranjeiru no Kooperasaun (MNEK), Praia dos Coqeiros Dili.

“Durante ne’e ita husu apoiu ba nasaun hotu oinsá bele kombate moras COVID-19 ne’e nasaun balu responde ona maibé,  Japaun nian mak foin responde hodi fó de’it apoiu osan 4.6 millaun,” dehan Babo ba jornalista sira ohin.

Objetivu husi apoiu orsamentu ne’e atu tulun Governu liliu Ministériu Saúde atu sosa ai-moruk no fasilidade prevensaun coronavirus.

“Ita tenke hola fali ekipamentu ba COVID-19 nian hola ai-moruk, hola luvas, máskara no hola ai-moruk seluk ne’ebé ita presiza, hodi aloka ba Ministeriu Saúde,”MNEK Dionísio Babo esklarese.

Iha biban hanesan Embaixadór Japaun, Kinefuchi Masami, hateten relasaun amizade entre nasaun rua kontinua metin, tanba ne’e Japaun sei kontinua fó apoiu ba Timor-Leste.

“Japaun ho Timor-Leste nia amiade metin liután ba oin, nasaun rua sai amigu ne’ebé di’ak, Japaun prontu apoiu nafatin iha área saida de’it nune’e bele tulun povu hotu moris di’ak liliu oinsá bele hadok an husi COVID-19,”  katak Embaixadór Japaun.

Jornalista  : Hortencio Sanchez

Editór        : Agapito dos Santos

HAKEREK NO HATÁN

Please enter your comment!
Please enter your name here