Sekretáriu Estadu Formasaun Profisionál no Empregu, Julião da Silva. Imajen Tatoli/ Egas Cristovão

DILI 16 juñu 2020 (TATOLI) Sekretáriu Estadu Formasaun Profisionál no Empregu, Julião da Silva, informa akordu koopersaun haruka traballadór timor-oan serbisu iha Japaun kuaze konklui no hein de’it formaliza husi Governu Japaun.

“Prosesu akordu ne’e ita hala’o porsentu 85 ona, maibé tanba COVID-19 maka ita seidauk bele asina akordu ne’e ho Governu Japaun atu lori ita-nia traballadór sira ba Japaun,” tenik Sekretáriu Estadu Julião da Silva iha salaun Fórum Organizasaun Naun Govermentál Timor-Leste (FONGTIL), Caicoli, tersa ne’e.

Tuir governante ne’e, akordu ne’ebé kuaze finaliza tanba haree husi parte Sekretaria Estadu Formasaun Profisionál no Empregu (SEFOPE) no Ministériu Negósiu Estranjeiru no Kooperasaun (MNEK) kuaze konklui ona prosesu.

“Akordu ne’e rasik ita ho parte Embaixada Japaun iha Timor-Leste laiha problema no agora hein de’it sira-nia Governu bele aseita ona no sira haruka ona pedidu ida mai ita hodi bele asina,” nia subliña.

Kona-ba kursu ba timor-oan sira ne’ebé atu servisu iha Japaun, Governu sei prepara ho di’ak hanesan fó kursu lian ba kandidatu traballadór sira molok atu aranka.

Daudaun ne’e timor-oan kuaze 6.000 maka serbisu iha Koreia no Austrália.

SEFOPE mós halo ona kontaktu ho Governu Irlanda atubele simu timor-oan bá serbisu iha nasaun refere.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here