Imajen Tatoli/Cipriano Colo.

DILI, 11 juñu 2020 (TATOLI)–Arsebispu Arkedioseze Dili, Dom Virgílio do Carmo da Silva, SDB hateten, prosesaun Kristu Nia Futar Isin no Ran hanesan biban nu’udár sarani atu hatudu fiar ba Maromak.

“Prosisaun ne’e nu’udár biban atu hatudu  ita-nia fiar ba Maromak, hodi husu tulun, bensaun, forsa no naroman ba ita no ba ita-nia rain. Aleinde ne’e,  hodi husu atu hadook ita hosi susar, moras no problema sira seluk, nune’e ema hotu iha obrigasaun atu hein ho fiar no devosaun tomak liuhosi halo orasaun,” dehan Dom Virgílio da Silva do Carmo, iha monumentu Nain Feto Lecidere, hafoin prosisaun Kristu Nia Futar Isin no Raan, kinta ne’e. 

Arsebispu ne’e hateten, tinan ida-ne’e tanba iha hela situasaun Estadu Emerjénsia, nune’e inisiativa arkedioseze ninian lori  Nai Jesus Kristu Ninia Futar Isin Santu rasik mak la’o ba vizita ninia sarani sira iha Dili laran.

“Ita troka uitoan estilu ida-ne’e, fó liután biban ba sarani barak ne’ebé bele besik liután no sente katak Maromak besik liután ba sira, liuliu iha tempu ida-ne’e ninia laran,” Arsebispu haklaken.

Imajen Tatoli/Cipriano Colo.

Bibi atan ne’e hatutan, realidade hatudu loos duni sarani sira mós iha saudades ba Maromak, nune’e ohin iha prosisaun ne’e, iha dalan sira, sarani barak hein, hakne’ak hodi simu bensaun hosi Jesus Nia futar isin. Hakne’ak hatudu domin boot ba Jesus Kristu, halo devosaun, ida-ne’e hanesan manifesatasaun ne’ebé kapaas loos liuliu iha tempu susar ninia laran.

Etretantu, rute ba prosisaun ne’e hahú hosi Igreja Bedois, Igreja Bekora, Kruzamentu Kuluhun, Kruzamentu Ospitál Nasionál Guido Valadares, Kruzamentu Top One, Kuartél Jerál Polísia Nasionál Timor-Leste (PNTL), Igreja Katedrál, Ponte Maloa, Kruzamentu Semináriu Maiór nia oin, Hudi-laran Elemloi, Ponte Komoro Trés, Golgota, Raikotu, Rotunda Komoro, Igreja Ai-mutin, Kuartél Jerál FALINTIL Forsa Defeza Timor Leste (F-FDTL), Palásiu Governu, Remata iha Monumentu Na’in Feto Lesidere, no taka ho Bensaun Santísimu.

Partisispa iha prosisaun ne’e, Sanseler Arkedioseze Dili, Padre Paulus Maya, Padre Sira husi arkedioseze Dili, relijiozu-relizioja sira, no sarani sira.

Prosisaun ne’e hahú hosi tuku 15:00 no ramata iha tuku 19:30, hetan seguransa másimu hosi Korpu eskuteiru Katólika arkedioseze Dili, Grupu Tunggal Hati Seminári Tunggal Hati Maria (THS-THM), no Polisia Nasionál Timor Leste (PNTL).

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here