Ministra Edukasaun Juventude no Desportu, Dulce de Jesus Soares asina MoU ho Reprezentante UNICEF iha TL, Valerie Taton. IMajen/ UNICEF

DILI, 10 juñu 2020 (TATOLI)-Ministériu Edukasaun Juventude no Desportu (MEJD) iha tempu badak sei simu tan apoiu tanki bee moos hamutuk 2.000 husi UNICEF hodi distribui ba eskola ensinu báziku iha territóriu Timor-Leste ba prevensaun surtu COVID-19.

Reprezentante UNICEF iha Timor-Leste, Valerie Taton, apresia ho esforsu Governu nian atu re-ativa prosesu aprendijazen ba estudante sira, tanba ne’e UNICEF kontinua fó apoiu ekipamentu hodi kria kondisaun ba eskola sira.

“UNICEF kontente loos bainhira simu karta husi Ministra Edukasaun kona-ba planu atu re-ativa eskola iha Timor Leste,  UNICEF prepara ona tanke 2.000 no tempu besik sei entrega ba Ministériu Edukasaun hodi forñese ba eskola sira,”informa Taton, foinlalais iha Vila-Verde Dili.

Apoiu  ne’e hodi kria kondisaun liliu garantia distasiamentu fiziku, sosiál tuir rekomendasaun husi Ministériu Saúde no Organizasaun Mundiál Saúde (OMS) hodi prevene propagasaun surtu coronavirus iha rai-laran.

“UNICEF nafatin ho ninia kompromisu laiha rezerva prontu atu fó nafatin apoiu iha kualker  tempu bainhira Governu presiza,”tenik tan.

Iha biban hanesan Ministra Edukasaun Juventude no Desportu, Dulce de Jesus Soares, hateten ho apoiu ne’e sei responde nesesidade eskola públiku sira tanba eskola barak seidauk instala tanke fase liman.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here