Governu liuhosi Sekretáriu Estadu Igualdade Jéneru (SEII), Maria José da Fonseca Monteiro de Jesus, ohin, asina Memorandum of Anderstanding (MoU) ho UN Women . Imajen/Mídia SEEI.

DILI, 10 Juñu 2020 (TATOLI)–Governu liuhosi Sekretáriu Estadu Igualdade Jéneru (SEII), Maria José da Fonseca Monteiro de Jesus, ohin, asina Memorandum of Anderstanding (MoU) ho UN Women ba implementasaun kona-ba apoiu orsamentu millaun $13.000 ba programa inisiativa Spotlight iha Timor-Leste.

Programa ne’e, nia hatutan, hetan fundu hosi Uniaun Europeia atu ajuda Governu no Sosiedade Sivíl iha Timor-Leste hodi aselera no esforsu atu hapara violénsia kontra feto no labarik-feto sira.

Programa ida-ne’e, tuir nia, hanesan parte hosi vizaun global atu atinji objetivu Dezenvolvimentu Sustentavél (ODS) kona-ba igualdade jéneru no nia tarjetu ba hapara violénsia kontra feto no labarik-feto sira iha tinan 2030.

Ho MoU ida-ne’e, nia dehan, UN Women mós aloka ona osan ho montante millaun $130.000 diretamente ba SEII  no sei oferese asisténsia tékniku hodi suporta SEII ba implementasaun Planu Asaun Nasionál ba Violénsia Bazeia ba Jéneru (PAN-VBJ) 2017-2021.

Tuir nia, asina nota ne’e sei kobre uluk implementasaun fulan 18 ba dahuluk nian, hosi fulan Juñu 2020-Dezembru 2022.

“UN Women parseiru ida importante ba Governu Timor-Leste iha promosaun igualdade jéneru no inkluzaun sosiál. Violénsia hasoru feto no labarik-feto nafatin sai barreira atu atinji igualdade no atu hamosu sosiedade ida ne’ebé inkluziva. Ho asinatura akordu ida-ne’e, iha ámbitu inisiativa spotlight nian fó tan dalan ba apoiu adisionál atu komplementa esforsu sira Governu nian atu hakotu violėnsia bazeia ba jéneru foka liu ba prevensaun,” dehan Maria José da Fonseca Monteiro de Jesus, iha ninia deskursu iha salaun SEII, Obrigado Barak, Dili, kuarta ne’e. 

Nia informa, UN Women no SEII sei kolabora hodi haforsa tan implementasaun, monitorizasaun no koordenasaun ba PAN-VBJ iha nivél nasionál no munisipál sira, inklui planeamentu no orsamentu ba liña ministeriál sira.

“Iha ne’e sei hadi’a esforsu prevensaun sira bazeia ba evidénsia, alinea ho SEII nia lideransa ne’ebé tutela iha PAN VBJ. Hasa’e kapasitasaun ba analiza no uza dadus kona-ba violénsia hasoru feto atu kria monitorizasaun no halo relatóriu ida ne’ebé forte liután ba esforsu sira atu elimina violénsia hasoru feto no labarik- feto sira,” nia dehan.

Nia esplika, Timor-Leste sei kontribui ba eliminasaun ba violénsia hodi hatán ba feto no labarik-feto sira nia presiza no haree ba kauza sira husi violénsia hasoru feto no feto sira liuhosi utiliza aprosimasaun multi-setorál no intersessional.

Modelu atu implementa intervensaun sira iha pilár neen hanesan () Leiislasaun no polítika, (2) Fortalesimentu institusionál, (3) Prevensaun ba Violénsia, (4) Servisu ne’ebé disponivel, asesivél no kualidade, (5) Dadus ne’ebé loos no kualidade, (6) Suporta movimentu feto no organizasaun sosiedade sivil sira.

Entretantu, Reprezentante UN Women iha Timor-Leste, Sunita Caminha, hateten iha mundu tomak dezafiu ba violénsia hasoru feto no labarik-feto sira sei sai hanesan violénsia ida ne’ebé pervasivu ba feto sira-nia direitu umanu no obstáklu ida ba avansa igualdade jéneru.

Nia dehan, ida-ne’e atu suporta Timor-Leste nia esforsu ne’ebé la’o hela atu prevene violénsia hasoru feto no labarik feto sira molok akontese no asegura responde multisetorál sira hodi suporta sobrevivente ba violénsia doméstika sira no violensia sira ne’ebé komete husi parseiru intimu sira.

Iha ne’e, nia hateten, Uniao Europeia halo parseria ho ONU iha Timor-Leste hodi dezenvolve Inisiativa Spotlight hamutuk ho Governu Timor-Leste liuhosi lideransa SEII no parseiru lubuk boot ida hosi sosiedade sivil.

Inisiativa Spotlight iha Timor-Leste, nia informa, implementa hosi Ajénsia ONU lima (UN Women, UNDP, UNICEF, UNFPA and ILO) no parseria ho SEII no sosiedade sivil lubuk ida tutela iha lideransa Koordenador Rezidenti ONU nian no UN Women nia responsabilidade mak hanesan tekniku koerensia hosi programa ne’e.

“Ho komesa husi ita-nia instituisau laran, servisu nasionalmente ho lokalmente, no hakle’an tan matenek no prátika sira kona-ba prevensaun violénsia hasoru feto sira. Parseria ne’e iha poténsia atu lori ita besik liután ba Timor-Leste ida ne’ebe feto no mane sira bele goja sira-nia direitu atu moris livre hosi violensia,” dehan Reprezentante UN Women iha Timor Leste, Sunita Caminha.

Nia dehan, vizaun jerál husi spotlight iha Timor-Leste mak hakarak haree feto no labarik-feto sira goja sira-nia direitu ne’ebé livre hosi violénsia iha Timor-Leste ida ne’ebé inkluzivu no equitativu.

Jornalista :  Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here