Primeiru-Ministru, Taur Matan Ruak, kinta (02/5), hato’o felisitasaun ba jornalista timor-oan no mós jornalista hotu iha mundu tomak ba loron mundiál liberdade imprensa ne'ebé selebra iha loron 3 maiu, kada tinan. Imajen/GPM

DILI, 10 juñu 2020 (TATOLI) – Primeiru-Ministru Taur Matan Ruak, konvoka reniaun ho Sekretáriu Estadu Komunikasaun Sosiál, Merício Juvinal dos Reis ‘Akara’ atu fó hanoin ba mídia sira atu kontinua promove pás no unidade nasionál hodi hamutuk dezenvolve Timor-Leste.

“Ita-nia Primeiru-Ministru husu atu mídia bele promove pás iha ita-nia rai no unidade nasionál,” informa Sekretáriu Estadu Akara hafoin hasoru malu ho PM Taur iha Palásiu Governu, tersa ne’e.

Tuir governante ne’e, informasaun edukativu sira maka bele enkoraja populasaun atu partisipa iha prosesu hotu iha dezenvolvimentu.

“Primeiru-Ministru fó hanoin atu mídia sira tenke kontribui pozitivamente ba situasaun ka dinámika ne’ebé daudaun ne’e mosu liuhosi promove idea kreativu ba ita-nia sidadaun, fó informasaun mais edukativu ho programa sira ne’ebé mak motiva ita-nia sidadaun sira atu kontinua servisu hodi dezenvolve ita-nia rai,” nia haktuir.

Nia dehan, Primeiru-Ministru nia hanoin katak kna’ar mídia nia importante tebes atu promove pás no unidade nasionál iha rai-laran.

“Mídia sira durante ne’e hatudu servisu ida pozitivu tebes, tanba ne’e maka ita presiza reforsa liuliu mídia Estadu hanesan Agência Tatoli no Rádiu no Televizaun Timor-Leste, Empreza Públika (RTTL,EP) inklui mídia privadu sira tenke kontribui maka’as liu no ka’er prinsípiu hanesan prinsípiu mídia Estadu nia hodi promove indetidade kultura no ita-nia unidade nasionál  hodi evita hatama iha notísia ka programa ida ne’ebé mak provokativu ho tendénsia rasizme inklui iha tendénsia des-akredita ita-nia Estadu nia dignidade,” nia akresenta.

Aleinde ne’e, Xefe Governu mós husu atu mídia sira kontinua promove ka hala’o kampaña  prevensaun COVID-19 iha nasaun ne’e tanba prosesu durante ne’e la’o di’ak tanba mídia sira liuhosi Sentru Mídia COVID-19 Sala Situasaun, Sentru Integradu Kestaun Krize (CIGC, sigla portugés) fasilita informasaun ba mídia sira atu sosializa no disemina informasaun atu populasaun sira bele prevene no proteje-an husi surtu COVID-19.

Ho nune’e, Sekretáriu Estadu ne’e promete atu koopera ho Ministru Asuntu Parlamentár no Komunikasaun Sosiál, Francisco Jerónimo hodi servisu di’ak liután dezenvolve área komunikasaun sosiál sira hodi fó dirasaun no polítika klaru ba setór komunikasaun sira ho kualidade.

“Koko atu uza ita-nia liberdade imprensa ne’e ho pozitivu la’ós tanba ita iha liberadade imprensa ona, ita promove fali rasizmu iha ita-nia rai no promove idea sira ne’ebé la konstrutivu no kria konflitu,” nia salienta.

Governu daudaun ne’e halo esforsu kria lei sira atu jere setór komunikasaun sosiál ho kualidade a’as no defende Estadu no nasaun liuhosi informasaun loloos no kredível atu reforsa sidadaun hotu no reforsa koñesimentu no mentalidade.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here