Profisionál saúde sira halo kampaña nasionál fase liman hodi prevene COVID-19 iha resintu HNGV. Imajen Tatoli/António Gonçalves

DILI, 10 juñu 2020 (TATOLI) – Ministériu Finansa (MF) liuhosi Konsellu Jestaun Fundu COVID-19 simu ona proposta ne’ebé mak aprezenta husi Ministériu Saúde (MS), kona-ba suplementu remuneratóriu ba profisionál saúde sira ne’ebé presta servisu durante surtu COVID-19 no konsidera hanesan ema liña frente.

Ekipa liña frente ne’e kompostu husi médiku, doutór, enfermeiru no servisu apoiu tékniku sira seluk.

Ministériu Saúde aprezenta proposta ho totál benefisiáriu hamutuk 3.070 maihusi minisípiu 12 inklui Rejiaun Administrativa Espesiál Oé-cusse Ambeno (RAEOA) ho totál orsamentu hamutuk millaun $3,9.

“Ministériu Saúde ha’u haree sira nia kalkulasaun kapas tebes tanba alokasaun ba sira millaun $4 maibé sira nia proposta mai ho millaun $3,9,” relata Koordenadór Sekretariadu Konsellu Jestaun Fundu COVID-19, Januário da Gama ba Agência Tatoli iha ninia kna’ar fatin, Ministériu Finansa, Aitarak-Laran, kuarta ne’e.

Antes ne’e, tuir orientasaun Primeiru-Ministru, Taur Matan Ruak nia katak, proposta ba pagamentu suplementu remuneratóriu ne’e tenke hetan validasaun husi Sala Situasaun Sentru Integradu Jestaun Krize (CIGC, sigla portugés).

Tanba ne’e maka hafoin simu proposta hosi MS, Konsellu Jestaun enkamiña ba Sala Situasaun hodi hetan validasaun, hafoin haruka hikas ba Konsellu Jestaun hodi halo konfirmasaun dala-ida tan ba númeru konta bankária benefisiáriu sira nia hodi halo transferénsia ona.

“Ministériu Saúde ninia pedidu ba subsídiu ha’u hetan ona despaisu horiseik no proposta ne’ebé Ministériu Saúde haruka ba Ministériu Finansa kompleta kedas ho lista ba profisionál saúde sira iha munisípiu 12 inklui mós orsamentu no númeru konta bankária kada benefisiária,” nia akresenta.

Tanba proposta ne’e klaru no kompletu ona, maka MF sei halo transferénsia emidiatamente hafoin hetan validasaun husi Sala Situasaun.

Atuál Diretór Jerál Planeamentu no Orsamentu MF ne’e subliña, iha proposta MS nian sita klaru kedas pilar ba profionál saúde sira, hahú husi pilár ida to’o lima.

Suplementu remuneratóriu bazeia ba rezolusaun ne’ebé aprovadu iha Konsellu Ministru estraordinária iha loron 5 maiu, ne’ebé sei oferese ba profesionál sira ne’ebé durante ne’e dedika sira nia-an hodi halo prevensaun ligadu ho surtu COVID-19 iha Timor-Leste.

MS prevee montante iha rezolusaun ne’e no fahe ba kategoria tolu no ne’ebé aplika ba profesionál sira ne’ebé konsidera hanesan liña frente no nia pagamentu sei sura kada loron.

Pagamentu $25 kada loron ba sira ne’ebé servisu iha fatin izolamentu no laboratóriu, $20 ba sira ne’ebé servisu iha kuarentena no mós $15 ba sira ne’ebé serbisu iha administrasaun ka sira ne’ebé apoiu maibé laiha kontaktu direta.

Ba motorista, forsa, defeza, imigrasaun, kuarentena, alfándega, no sira ne’ebé servisu iha fronteira, aeroportu, portu no terrestre kada loron $15.

Enkuantu ba pesoál água no saneamentu, elétrisidade, limpeza, seguransa sivíl, no pesoál sira rekolla lixu kada loron $5.

Jornalista: Antónia Gusmão

Editora: Julia Chatarina

1 KOMENTÁRIU

  1. Be oinsa ho ami Voluntario sira nebe durante hamutuk ho Profesional saude sira hodi combate COVID-19 Ne iha direito bele hetan Suplemento Remunitorio ga lae??

    Obrigada

HAKEREK NO HATÁN

Please enter your comment!
Please enter your name here