Xefe Sentru Saúde Formoza II, Dulce Pinto Tilman

DILI, 10 juñu 2020 (TATOLI)-Durante fulan-maiu 2020, Sentru Saúde Formoza II Dili, rejista ona pasiente ho moras infesaun vias respiratóriu ka ISPA hamutuk ema na’in 969 no pasiente pozitivu dengue na’in haat.

Xefe Sentru Saúde Formoza, Dulce Pinto Tilman, relata aleinde ISPA, nia parte mós fó tratamentu saúde ba pasiente ho moras diarea hamutuk 164, pneumonia 60, moras kulit (dermatiti) na’in haat.

Pasiente dengue na’in haat ne’e maioria afeta ba labarik ho tinan lima ba leten. Moras ne’e mosu tanba komunidade moris iha ambiente la seguru ka fo’er.

Atu prevene moras perigu ne’e, tuir nia populasaun tenke hela iha ambiente moos no saudavel, taka bee nalihun sira, hamoos uma hun, toba uza moskuteiru no seluk tan.

”Ita haree de’it ba tempu ne’e dalaruma udan depois dalaruma bailoron tanba ne’e ita-nia komunidade ladun haree ba ijiéne pesoál entaun moras nee aumenta sa’e,” dehan nia ba jornalista sira iha ninia servisu fatin, ohin.

Nune’e iha fulan hanesan parteira sira konsege fó mós partu ba Inan isin-rua hamutuk 50 ho kondisaun saude normal.

Kona-ba fasilidade no medikamentu, nia esplika sei sufisiente hodi fó atendimentu ba pasiente sira.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here