Ekipa saneamentu Munisipiu Dili, hamoos hela valeta ne’ebé nakonu ho plástiku no tahu iha Tasi-Tolu. Imajen Tatoli/António Gonçalves

DILI, 10 juñu 2020 (TATOLI) – Ministériu Finansa (MF) liuhosi Konsellu Jestaun Fundu COVID-19 halo esforsu rezolve subsídiu ba ekipa sanementu sira ne’ebé hala’o serbisu durante implementasaun Estadu Emerjénsia ligadu ho surtu COVID-19 iha Timor-Leste.

Koordenadór Jerál Sekretariadu Konsellu Fundu COVID-19, Januário da Gama, informa kona-ba subsídiu ba pesoál saneamentu sira, Ministériu Administrasaun Estatál (MAE) haruka ona proposta ba MF, maibé laiha kabimentu orsamentu.

“Sekretariadu Tékniku iha obrigasaun ami tenke hatan fali ba MAE atu sira bele halo konfirmasaun ho Sala Situasaun Sentru Integradu Jestaun Krize (CIGC, sigla portugés) atu haree prosesu anteriór, tanba saida mak MAE lahetan alokasaun. Resposta hosi CIGC hateten katak uluk kuandu CIGC formula planu kona-ba atividade no orsamentu sira ne’e, pasa hotu informasaun sira ne’e ba entidade hotu, maibé MAE la aprezenta proposta kona-ba ninia atividade no kabimentu orsamentu”, relata Koordenadór ne’e ba Agência Tatoli iha ninia kna’ar fatin, Ministériu Finansa, Aitarak-Laran, kuarta ne’e.

Tuir Januário, MAE aprezenta ona pesoál saneamentu iha munisípiu 12 maibé hafoin Sekretariadu Tékniku iha MF halo komfirmasaun ho kabimentu orsamentu orjinalmente MAE lahetan alokasaun orsamentu.

Atuál Diretór Jerál Planeamentu Orsamentu MF ne’e afirma, maski kabementu orsamentu laiha maibé Dekretu-Lei hatuur katak sira (pesoál saneamentu) mós iha direitu atu hetan subsídiu entaun Sekretariadu Tékniku iha obrigasaun atu rezolve.

“Ami sei aprezenta fali ba Konsellu Jestaun Fundu COVID-19 atu buka solusaun ba ninia kabimentu orsamentu, tanba Dekretu-Lei hateten katak ema sira ne’e iha direitu hetan remuneratóriu ho montante ne’ebé mak determina ona iha Dekretu-Lei ba pagamentu subsídiu,” nia subliña.

Tuir Dekretu-Lei, orsamentu ne’ebé aloka hodi halo pagamentu suplementu remuneráriu ba ekipa saneamentu hamutuk $190.000.

Suplementu remuneratóriu bazeia ba rezolusaun ne’ebé aprovadu iha Konsellu Ministru estraordinária iha loron 5 maiu, ne’ebé sei oferese ba profesionál sira ne’ebé durante ne’e dedika sira nia-an hodi halo prevensaun ligadu ho surtu COVID-19 iha Timor-Leste no konsidera hanesan liña frente.

Suplementu remuneratóriu ba pesoál água no saneamentu, elétrisidade, limpeza, seguransa sivíl, no pesoál sira rekolla lixu kada loron $5.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here