Ajensia Internasional KOICA ho Internasional Organisation Migration (IOM) Hamutuk Laboratorio Saúde HNGV Asina Nota Intendementu hodi Reforsa Servisu ba Prevensaun Surtu Covid-19. Imajen /Egas Cristovão

DILI, 09 juñu 2020 (TATOLI)-Ajénsia Internasionál KOICA ho Internasional Organisation Migration (IOM) tersa ne’e, asina ona nota intendimentu ida ho Laboratóriu Nasionál atu reforsa servisu ba prevensaun surtu COVID-19 iha Timor-Leste bainhira mosu kazu foun.

“Ohin asina akordu ne’e ho KOICA no IOM atu haforsa liutan servisu liña koordenasaun no kolaborasaun entre Laboratóriu Nasionál liliu liga ba servisu diagnóstika COVID-19 nian iha Timor-Leste,” informa Diretóra Ezekutiva Laboratóriu Nasionál, Edang Soares da Silva ba Jornalista Sira iha Bidau, ohin.

Nota Intendimentu ne’e atu kria kondisaun iha Laboratóriu Nasionál ba atende kazu Coronavirus iha Timor-Leste.”Apoiu ne’e foka liu ba oinsá ita-nia laboratóriu bele halo teste ida ne’ebé lais no kualidade di’ak ba COVID-19,”tenik tan.

Iha Biban hanesan Country Director KOICA Timor-Leste, Sikhyon Kim, hatete ho akordu ne’e sei kria kondisaun di’ak ba servisu Laboratóriu Nasionál.

“Ita haree Timor-Leste susesu ona sai husi situasaun nakukun tanba koordenasaun entre lideransa sira kapas tebes no ha’u hato’o ha’u-nia apresiasaun ba lider hotu iha bele hamutuk kontra COVID-19, apoiu ne’ebé ami sei halo bainhira mosu fali segunda faze nian ami sei apoiu hodi luta hasoru,” dehan nia.

The Korea International Cooperation Agency sei prontu nafatin hamutuk ho Governu Timor-Leste atu kombate hasoru moras COVID-19 bainhira mosu filafali kazu foun.

“Saúde báziku hanesan pilár importante ida ne’ebé KOICA sempre fó atensaun hodi kontribui ba moris di’ak povu nian tanba saúde importante ba ema hotu,” nia hateten.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here