Imajen tatoli/António Goncalves

DILI, 08 juñu 2020 (TATOLI)—Parlamentu Nasionál (PN), segunda ne’e, aprova Konta Jerál Estadu (CGE-Sigla portugés) 2018 hosi despeza tomak ne’ebé finansia iha tinan tolu liubá.

Entretantu, relatóriu no pareser ne’ebé aprova iha nível Komisaun C (Finansa Públika) iha loron 13 fevereiru 2020 no ohin aprova iha plenária, Parlamentu Nasionál.

Iha segunda ne’e, Parlamentu Nasionál aprova rezolusaun númeru 53/V/2/2020 kona-ba Konta Jerál Estadu ho votu a-favó 40, kontra 0 no abstensaun 11.

Parlamentu Nasionál aprova Konta Jerál Estadu ne’e bazeia ba rekomendasaun no pareser hosi Kámara Kontas Tribunál Superiór Administrativu, Fiskál no Kontas (LOCdC-sigla portugés), ne’ebé elabora hosi Komisaun C (Finansa Públika).

“Konta Jerál Estadu 2018 nian aprovadu no Parlamentu Nasionál depozita konfiansa ba Governu atu asume responsabilidade hanesan ohin promete tiha ona atu implementa rekomendasaun 26 hosi Tribunál Kontas,” Prezidente Parlamentu Nasionál, Deputadu Aniceto Longuinhos Guterres Lopez, pronunsia liuhosi plenária, segunda ne’e.

Iha relatóriu no pareser ne’e kona-ba Konta Jerál Estadu (CGE-sigla portugés) 2018 Kámara kontas formula rekomendasaun hamutuk 26 ba Parlamentu Nasionál no Komisaun C elabora atu Governu bele implementa rekomendasaun hirak ne’e .

Konta Jerál Estadu 2018 espella (espelha) atividade finanseira estadu-nian iha períodu entre 01 janeiru no 31 dezembru 2018, tantu parte reseita no despeza públika hosi tezouraria, dívida públika no patrimóniu estadu nian.

Apresiasaun konta jerál estadu ne’e bazeia ba lei númeru 1 artigu 29 kona-ba Lei Orgánika Kámara Kontas hosi Tribunál Superiór Administrativu, Fiskál no Kontas (LOCdC-sigla portugés) ne’ebé kompete ba Tribunál liuhosi Kámara Kontas (CdC-sigla portugés) hodi fiskaliza legalidade despeza públika no julga Konta Estadu nian.

Iha ezersísiu podér ba kontrolu polítiku kona-ba atividade finanseira estadu nian ne’ebé Konstituisaun no Lei Orsamentu no Jestaun Finanseira (LOGF-sigla portugés) artigu 42 atribui ba Parlamentu Nasionál hodi halo apresiasaun ba konta jerál estadu, toma konsiderasaun hosi relatóriu no pareser hosi Kámara Kontas (CdC), ne’ebé submete ona fulan-12 antes ne’e.

Rekomendasaun no Pareser importante 5 hosi 26 rekomendasaun hosi Kámara Kontas Tribunál Superiór Administrativu, Fiskál no Kontas (LOCdC-sigla portugés), ba Komisaun C (Finansa Públika) mak hanesan tuir mai ne’e:

  1. Klarifikasaun lejizlativa kona-ba matéria ne’ebé relasiona ho prestasaun kontas seguransa sosiál nian hosi parte integrasaun kona-ba seguransa sosiál ba iha Konta Jerál Estadu nian.
  2. Unidade sira-ne’ebé hakru’uk ba prestasaun kontas tenke iha Lei Organizasaun Kámara Kontas no tenke hatama ba Kámara de Kontas kada tinan kona-ba dokumentu prestasaun kontas nian to’o 31 de maiu tinan ida tuir kedas.
  3. Konta Jerál Estadu nian tenke konsolida saldu tezoruria hosi entidade públika sira hotu ne’ebé obdese ba prinsípiu orsamentál, unidade no universalidade, tenke integra perímetru kona-ba konsolidasaun kontas ninian.
  4. Rekomenadasun ida tán mak dívida naun-finanseira ne’ebé oras ne’e instituisaun balun sei iha dívida.
  5. Relatóriu Tribunas das Kontas ne’e konsta mós infrasaun finanseira lubun boot ida ho nia natureza infrasaun ne’e sansionatória, oinsa mak efetiva responsabilidade hosi insituisaun públiku sira hotu.

Ho rekomendasaun hirak ne’e, Prezidente Parlamentu Nasionál, Aniceto Longuinhos Guterres Lopez, husu Governu implementa rekomendasaun no pareser hosi Kámara Kontas Tribunál Superiór Administrativu, Fiskál no Kontas nian.

“Ha’u halo konkluzaun Governu atu kumpre rekomendasaun hirak ne’e tanba Relatóriu Tribunas das Kontas ne’e konsta mós infrasaun finanseira lubun boot ida ho nia natureza infrasaun ne’e sansionatória,” Prezeidente PN ne’e rekomenda ba Governu.

Hatán ba rekomendasaun hirak ne’e, Ministru Finansa, Fernando Hanjam, kompromte implementa rekomendasaun balun hosi pontu 26 tanba balun implementa tiha ona.

“Rekomendasaun sira-ne’ebé eskreve ona iha relatóriu no parereser ami sei hadi’a frajilidade, infrasaun finanseira sira, ami sei kumpre rekomendasaun hirak ne’e,” nia dehan.

Entretantu, Vise-Ministra Fianansa Sara Lobo Brites toma nota no sei mellora iha aprezentasaun Konta Jerál Estadu nian tuir-mai.

“Ezekusaun orsamentu 2018 nian atinje 99%, ezekusaun ne’e bazeia ba orsamentu ne’ebé Parlamentu Nasionál aprova,” nia dehan.

Parlamentu Nasionál aprova OJE 2018 ho montante Biliaun $1,279. Hosi Biliaun $1,279 komposta hosi saláriu no vensimentu millaun $200,312, bens no servisu millaun $421,666, transferénsia públika millaun $261,925, kapitál menór millaun $3,659 no kapitál dezenvolvimentu millaun $392,037.

Hosi OJE 2018 ho montante Biliaun $1,279 ho ninia ezekusaun to’o 31 dezembru 2018 atinje 99%.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here