Jornalista Agência Tatoli, Eugénio Pereira, halo entrevista ho Lider Karizmátiku, Kay Rala Xanana Gusmão.

DILI, 08 juñu 2020 (TATOLI) – Komandante Ein-Xefe FALINTIL,  Kay Rala Xanana Gusmão, deklara, nia la iha rezerva defende Timór nia belun advogadu Witness K no Bernard Collaery iha julgamentu iha Tribunál Austrália.

Notísia Relevante : Karta Husi Bernard Collaery: “Ha´u Sei Kontinua Ajuda Imi”

Públiku atus ba atus entuziasmu ba asina mensajen solidariedade solidariza advogadu Bernard Collaery no Witness K, iha posku konsentrasaun MKOTT, jardin Liceu. Imajen/Facebook Ryo Loriku Lialuli

Tuir Ajenda Tribunál Austrália nian, iha loron 01 juñu liubá, Xanana atu ba Austrália hodi sai testemuña husi parte advogadu na’in-rua ne’e nian iha Tribunál Austrália, maibé tanba sitasaun COVID-19, nune’e Xanana husu atu ekipa Gabinete Fronteira Marítima koordena ho ekipa g7+ hodi fasilita fatin tele-konferénsia  hodi bele hato’o direita ba juis sira bainhira prosesu justisa hala’o.

“Tuir loloos ha’u atu ba Austrália para defende kazu Witness K, Bernard Collaery iha tribunal, maibé tanba situasaun COVID-19 ne’e maka ha’u la konsege ba maka ha’u husu se bele Gabinete Fronteira Marítima no g7+ fasilita tele-konferénsia para ha’u bele ko’alia ho juis sira bele hatán liu husi tele-konferénsia, se juis sira husu para ha’u hatán,” hateten Xanana, hodi responde Agência Tatoli, segunda ne’e.

Xanana dehan, prosesu justisa ne’ebé Witness K, Bernard Collaery hasoru nu’udar presaun ida husi Governu Austrália, hafoin belun boot Timór nian ne’e lekar sai segredu intelijénsia Austrália halo operasaun espionajen  hasoru Timor-Leste iha tinan 2004 no ajuda mós Timor-Leste manan negosiasaun fronteira marítima permanente husi Austrália.

“Governu Austrália ne’e ha’u la fiar sira nia polítika, tanba problema sira ne’e hotu, bainhira ita sei funu sira ba buka foti ita nia rikusoin iha tasi laran, too ikus ita hadau fali ita nia rikusoin fronteira marítima, ha’u husu ba sira atu tau tiha kazu Bernard Collaery no Witness K ba kotuk, haluha tiha, mais sira tau nafatin. Koitadu, tanba problema ne’e kona-ba sira intelijénsia (Australian Securty Intellegence) ASIO mai sadap ita nia governu too ita lori Austrália ba tribunál hodi ita manan tiha fronteira ne’e,” dehan Xanana.

Ho triste, Xanana dehan, Austrália rai boot, rai riku ne’ebé hanorin ema iha mundu tomak hodi ko’alia barak kona-ba demokrasia no justisa, maibé sira rasik maka limita movimentu Advogadu Witness K no Bernard Collaery hodi hasoru prosesu justisa iha presaun nia laran.

“Sira hanorin ita direitus umanus, respeitu ema, mais sira nia sistema aat liu no bosok ten liu,” Xanana preokupa.

Xanana rasik kontaktu ona advogadu ruma ne’e hodi fó suporta morál no konsidera sidadaun estranjeiru rua ne’e hanesan eroi boot ida ne’ebé ajuda Timor-Leste manan hikas ninia soberania tasi ne’ebé disputa durante tinan-45 nia laran.

Lider Karizmátiku ne’e hatutan, prosesu julgamentu ne’e Tribunál Austrália atu hala’o iha tempu besik, maibé ninia parte seidauk hatene klaru data loloos, tanba sei hein desizaun husi Tribunál Austrália.

Bernard Collaery no Witness K rasik hetan akuzasaun, tanba konsidera sira viola aktu intelijénsia, tanba lekar sai asaun espionajen Australia nian  hasoru Timor-Leste.

Iha loron 29 juñu 2019 liubá, Tribunál Austrália rasik halo prosesu julgamentu hodi rona deklarasaun husi Bernard Collaery.

Bernard Collaery no Witness K mós konsidera asaun Governu Austrália kontra direitu sira nian nu’udar ataka ida iha liberdade espresaun.

Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here