Ai-han iha Mercado Taibesse. Imajen Tatoli/Egas Cristovão

DILI, 08 juñu 2020 (TATOLI) – Relasiona ho komemorasaun Loron Mundiál Ai-han Seguru ne’ebé monu iha loron 7 juñu, Organizasaun Mundiál Saúde (OMS) husu ba Timor-Leste tenke tau atensaun ba Ai-han Seguru.

Iha loron ne’e, Autoridade Inspesaun Fiskalizasaun Atividade Ekonómia Sanitária, Institutu Públiku (AIFAESA,IP) hamutuk ho OMS no Ministériu Saúde realiza inspesaun konjunta ba restaurante, supermerkadu no merkadu.

Diretór Operasaun AIFAESA, Gabriel da Costa, hateten OMS sujere atu Timor-Leste presiza tau-atensaun ba Ai-han Seguru.

“Ita foin halo selebrasaun ba dala-rua, tanba ne’e importante ita tenke fó informasaun ba ita nian negosiante sira, kona-ba sé maka sei halo negósiu, liuliu ba ai-han seguru nian presiza haree didi’ak, liuliu ba na’an manu sira tenke tau iha konjeladór ne’ebé maka ho nia temperatura tenke ho kondisaun ne’ebé di’ak. Bainhira ahi mate karik labele kontinua fa’an maibé tenke hasai atu ita-nia konsumidór sira mai hola hodi konsumu filafali no mós ba ai-han sira seluk mós hanesan,” dehan Diretór ne’e ba Agência Tatoli via telefónika, segunda ne’e.

Dirijente ne’e mós apela ba negosiante sira, bainhira oferese ka fa’an ai-han ruma ba komunidade sira presiza garantia seguru ba saúde públika.

“Ita-nia negosiante sira bainhira loke negósiu, presiza oferese ai-han ne’ebé seguru hanesan iha restorante tenke haree uluk fatin ne’e ijiene ka lae,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here