Imajen facebook.

DILI, 06 juñu 2020 (TATOLI)–Xefe Suku Becora, Antonio da Silva Soares, afirma hamutuk ho komunidade Becora sei la tolera hahalok ema balun ne’ebé mak estraga estatua Nain Feto, tanba pela primeira vez ema baku rahun estatua Nain Feto iha área Becora nian.

“Ohin dadeersan, ha’u hetan kontaktu hosi sarani balun iha Igreja ne’e, hodi hateten katak ema balun estraga estatua Nossa Senhora iha Gruta Ave Maria. Nune’e mak ha’u la tolera hahalok ne’e,” dehan xefe suku ba Ajensia TATOLI, bainhira hatuur Ilas Nossa Senhora iha salaun Parokial Becora, sábadu ne’e.

Tuir nia, estátua Nossa Senhora la’ós monu maibé deskonfia ema balun mak baku rahun estátua Nossa Senhora nian. Tanba, se estátua mak monu karik, Nossa Senhora nia liman labele monu fali iha kampu laran, tamba estátua Nossa Senhora nia rohan balun monu iha ampu laran maizumenus metru 50.

“Ita hateten katak ema mak baku rahun. Se nakfera Nossa Senhora nia liman labele soe fila fali iha kampu nian. Tanba ne’e mak ha’u hateten katak ema mak baku rahun,” nia dehan.

Autoridade lokál ne’e dehan, to’o agora Polísia liuhosi OPS ho polisia invetigasaun Dili nian hosi Munisipiu Dili nian halo ona investigasaun ba joven na’in rua ne’ebé halo seguransa iha Igreja Becora nian no ema estranjeiru balun sira ne’ebé mak hala’o serbisu iha Igreja Becora nian. Tamba tuir ema estranjeiru sira-ne’e katak hodi kalan iha karreta ida mak mai para iha estrada.

Ho akontesimentu ne’e, nia parte kontaku kedas autoridade sira iha Postu Administrativu Kristu Rei nian, Polísia Nasional Timor Leste eskuadra Becora nian, autoridade lokal balun atu halo investigasaun ho loloos no momoos atu bele identifika ema balun ne’ebé mak estraga estátua Nain Feto ne’e.

Iha fatin hanesan, tuir amu paroku Becora, Domingos Maubere, hateten akontesimentu estátua nakfera ne’e hanesan hanesan hatudu sinál ida mai ita.

“Ohin dadeer ha’u halo misa hotu ema ema fó hatene ha’u. Buat sira ne’e akontese, kuandu ita tau estátua iha liur ho risku. Rsku ne’ebé mak animál mak halo monu ka, labarik sira mak halo ka, ou ema hanoin aat mak halo akontese, la dauk hatene. Maibe, baut sira ne’e, hatudu sinal ida,” nia dehan.

Maske nune’e, nia parte husu nafatin sarani sira atu hakle’an devosaun, moris sarani nian no oinsá bele hakle’an liután devosaun ba Nain Feto, moris tuir Maromak nia hakarak no buat sira ne’e mak importante ba sarani sira atu moris tuir,” nia hateten.

“Se ema ruma mak hanoin aat, ida-idak mak hanoin aat hodi estraga Nain Feto karik, ema ida-idak mak responsavel. Ita la’ós duun,” nia dehan.

Padre paroku ne’e dehan, to’o oras ne’e daudaun nia parte seidauk hatene motivu hosi estraga ema seluk ka buat ruma. Maibe, nia parte konsidera nafatin katak buat hotu-hotu akontese hosi Maromak rasik mak akontese.

Nia dehan, oras ne’e daudaun autoridade lokál no munisipál hamutuk ho polisia sira mak halo hela investigasaun ba akontesimentu ne’e.

Tuir observasaun ida hosi Ajensia TATOLI, oras ne’e daudaun sarani Becora kontinua vizita ilhas Nain Feto nian ne’ebé mak baku rahun iha salaun parokial Becora nian, hodi halo orasaun no devosaun ba Nain Feto.

Jornalista : Domingos Piedade Freitas

Editór      : Cancio Ximenes

HAKEREK NO HATÁN

Please enter your comment!
Please enter your name here