Kolxaun ne’ebé oferese hosi UPF hodi ajuda servisu instalasaun kuarentena iha Postu Integradu Batugade. Imajen/Eugénio Pereira

COVALIMA, 06 juñu 2020 (TATOLI)-Administradór Munisípiu Covalima, Afonso Noguiera Nahak, preokupa ho kondisaun infraestrutura no ekipamentu prevensaun COVID-19 iha kuarentena no fatin izolamentu ne’ebé maka estabelese iha Munisípiu fronteira ne’ebá.

“Ha’u nia preokupasaun mak tenki hadi’a tan infraestutura kuarentena, fatin izolamentu no tenki hari’i mós fatin simitériu,” dehan Autoridade Munisípiu ne’e hafoin halo enkontru ho ekipa Ministériu Saúde, iha Covalima, sábadu ne’e.

Aleinde ne’e, sira mós husu ba Governu atu apoiu mós karreta ambulánsia hodi tula de’it pasiente COVID-19 ka sidadaun ne’ebé maka ultrapasa fronteira ho ilegál hodi desloka ba kuarentena obrigatóriu durante loron 14 ba prevensaun coronavirus.

“Husu ba Ministériu Saúde atu tau karreta espesifiku ida iha fronteira Mota-Masin atu nune’e sidadaun ruma tama ilegál ita lori kedas ba kuarentena,”tenik Afonso.

Iha fatin hanesan Diretóra Jerál Prestasaun Saúde, Odete Viegas da Silva, hateten implementasaun Estadu Emerjénsia datoluk ne’e konsentra ba área fronteira tanba ne’e, Ministériu Saúde sei konsidera preokupasaun ne’e hodi rezolve.

“Semana oin ekipa sira tun hodi haree daudaun fatin sira hanesan kuarentena no izolamentu no ida ne’ebé mak seidauk prontu ita avansa daudaun ona,” responde Reprezentante Ministériu Saúde ne’e.

Kona-ba karreta ambulansia, Odete tenik tan Ministériu Saúde mós sei haree atu responde kestaun ne’e hodi fasilita prosesu tula pasiente COVID-19.

Kuarentena Suai iha kuartu hamutuk 33 no kompleta de’it ho kulsaun maibé laiha ekipamentu seluk hanesan armáriu, kama, meja, kadeira tanba ne’e ekipa tékniku sei kompleta iha semana oin.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here