Xefe Ekipa Téknika Responsável ba elaborasaun planu Rekoperasaun Ekonómika pós-COVID-19, Rui Augusto Gomes. Imajen Tatoli/Egas Cristovão

DILI, 05 juñu 2020 (TATOLI) – Hafoin hetan fiar husi Prezidente Repúblika, Francisco Guterres ‘Lú Olo’ hodi asume kna’ar lidera ekipa rekuperasaun ekonómika iha rai-laran, Rui Gomes hasoru Primeiru-Ministru (PM), Taur Matan Ruak hodi simu orientasaun.

“Primeiru-Ministru ko’alia ho Prezidente Repúblika atu autoriza ha’u-nia servisu mai ajuda lidera ekipa ida hodi prepara planu ba rekuperasaun ekonómika tanba planu ne’e importante tanba aspetu COVID-19 afeta demais ba ekonomia. Presiza buka meiu atu hadi’a filafali ekonomia, tanba ne’e maka ha’u simu orientasaun husi Primeiru-Ministru,” relata Xefe Ekipa Téknika no Responsável Elaborasaun ba Planu Rekoperasaun Ekonómika pós-COVID-19, Rui Gomes, hafoin hasoru PM Taur iha Palásiu Governu, sesta ne’e.

Ba oin, eis Ministru Planeamentu no Finansa ne’e sei estabelese ekipa ida hodi tau hanoin hamutuk ba asuntu rekuperasaun ekonómika.

“Ha’u ho Primeiru-Ministru ko’alia kona-ba servisu ba oin nian no ha’u mós tenke forma ekipa ida, tanba ne’e hanesan ezersísiu ne’ebé kompleksu no envolve rigór tanba presiza analiza dadus sira ne’e atu ami mós bele ko’alia tanba servisu seidauk hahú labele ko’alia barak lai,” dehan Rui.

Ekipa ne’ebé sei envolve maka husi Unidade Planeamentu, Monitorizasaun no Avaliasaun (UPMA), ministériu relevante, ajénsia internasionál, no setór privadu sira

“Ami sei deskute, ko’alia kona-ba estratejia saida atu avansa ekonomia ne’e ba oin,”nia akresenta.

Iha segunda (08/06) ekipa hahú servisu no hetan termu referénsia inklui responsabilidade ne’ebé sei lori hodi hetan aprovasaun iha Konsellu Ministru.

Entretantu, Rui Gomes sente previlejiu boot tanba hetan konfiansa hosi Xefe Governu no Xefe Estadu hodi lidera ekipa ida importante tebes.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here