Imajen Tatoli/Evaristo Soares Martins.

DILI, 05 juñu 2020 (TATOLI)—Partido Democrático (PD), ohin, halo reflesaun hodi hanoin hikas saudozu Fernando de Araújo “La Sama” ne’ebé husik hela prinsípiu “Ha’u-Nia Dignidade La Ass Liu Dignidade Estadu”.

“Ohin loron, ami hotu halo reflesaun. Timoroan hotu halo reflesaun katak ita lakon eroi ida Fernando “La Sama” de Araújo no Partido Democrático lakon nia prezidente ida. Ohin, ami hamutuk hakarak komunika prinsípiu ne’ebé ke nia husik hela “Ha’u-Nia Dignidade La Aas Liu Dignidade Estadu Nian”, Prezidente Partidu Democrático, Mariano “Assanami” Sabino, informa liuhosi Konferénsia Imprensa iha sede PD, Colmera, Dili, sesta ne’e.

Tanba ne’e, Partido Democrático husu ba líder polítiku sira atu tau forsa hamutuk nune’e fó eperansa nafatin ba povu iha rai ida-ne’e.

“Ita hotu tenke hamutuk hakotu impase ida-ne’e no ita hotu tenke hamutuk hodi normaliza fila-fali ekonomia nune’e lori Timor-Leste ba-oin,” dehan Assanami.

Prezidente Partido Democrático ne’e fó-sai katak, ohin estrutura partidu nian ko’alia mós selebrasaun partidu nian iha tempu badak.

“Partidu Demokrátiku hamriik ba Estadu no halo buat lubuk ona ba Estadu maski seidauk to’o tanba votu ne’ebé iha laboot hanesan partidu boot sira maibé PD nafatin esforsu no haka’as-aan para dedika no serbí ba estadu hodi komunika nafatin prinsípiu oinsá dezenvolve rai ida-ne’e,” nia dehan.

Assanami husu ba inan-aman sira atu krítika nafatin PD no kuidadu nafatin partidu ida-ne’e hodi sai instrumentu polítiku ne’ebé kaer-metin Repúblika Demokrátika Timor-Leste.

“Ohin hamriik transforma sosiedade sai demokrátiku, PD konta ho imi, PD aliadu ho povu no PD la’o hamutuk ho imi la’o bá-oin,” nia hateten.

Assanami lori estrutura PD husu deskulpa ba kuadru sira karik durante ne’e seidauk tuir hotu-hotu nia mehi maibé lolo-liman ba hotu-hotu hodi haboot partidu ida-ne’e.

“Imi sira-ne’ebé mak fundadór PD no sira-ne’ebé mak haka’as-aan iha kraik hodi halo boot partidu ne’e, ohin partidu mantein hodi husu nafatin imi-nia kontribuisaun. Ita sei halo selebrasaun ida-ne’ebé boot iha dia 19 juñu para hamutuk haforsa PD hodi kontrui rai ida-ne’e,” nia dehan.

 Jornalista : Evaristo Soares Martins

Editór         : Cancio Ximenes

HAKEREK NO HATÁN

Please enter your comment!
Please enter your name here