Prezidente Repúblika,Francisco Guterres Lú Olo. Imajen Tatoli/António Gonçalves

DILI, 05 juñu 2020 (TATOLI)–Prezidente Repúblika, Francisco Guterres, ohin, promulga Dekretu-Lei atu Estadu fó apoiu finanseiru hodi selu pursentu neen nulu (60 %) osan-funan ba sidadaun ida-idak, organizasaun koletiva, emprezáriu no empreza ne’ebé iha kréditu hosi finansiadór sira (banku ou instituisaun finanseira).

Komunikadu ne’ebé Ajénsia TATOLI asesu hosi média Prezidénsia Repúblika hateten, ho implementasaun Dekretu-Lei ne’e, ema, organizasaun no empreza ne’ebé iha kréditu sei selu de’it osan-funan 40% ba finansiadór ne’ebé fornese émprestimu.

Estadu Timor-Leste sei selu osan-funan 60% ba finansiadór ne’ebé fornese kréditu ba sidadaun ho nasionalidade Timorense, organizasaun koletiva lahó orientasaun lukrutiva ho sede iha Timor-Leste, emprezáriu komersiais individual nia naran no empreza rejistada.

Dekretu-Lei ne’e la aplikavel ba atividade telekomunikasaun, indústria estrativa no servisu finanseiru.

Benefisiariu sira ne’ebé Estadu sei fó apoiu finanseiru mak iha kréditu ho klasifikasaun ‘standard’ ka ‘under supervision’, la aplikavel ba kréditu sira ne’ebé iha fulan rua antes banhira Dekretu-Lei ne’e tama iha vigor viola akordu kréditu nian no kumpre obrigasaun hotu-hotu ne’ebé Estadu ka entidade públika seluk regula, hanesan selu impostu no seguransa sosiál.

Implementasaun estadu emerjénsia atu prevene no kontrola COVID-19 hamenus atividade ekonómika ne’ebé lori konsekuénsia ba rendimentu família no empreza sira. Rendimentu ne’ebé tun implika ba sidadaun no empreza sira atu kumpre nia dever selu kréditu ba banku.

Apoiu finanseiru hosi Estadu sei hakma’an sira ne’ebé halo kréditu iha institusaun finanseiru no sei tulun banku sira atu kontinua fornese kréditu ba sidadaun, organizasaun no empreza sira seluk hodi haburas ekonomia rai-laran durante implementasaun estadu emerjénsia ninian.

Tanba ne’e, iha 8 maiu,  Konsellu Ministru aprova Dekretu Lei kona-ba Moratória no cumprimento de obrigações emergente de contratos de concessão de crédito no âmbito da política económica de resposta ao COVID-19 nu’udar medidas atu hakmaan sidadaun, instituisaun koletiva no empreza sira ne’ebé foti kréditu iha Banku.

Medida ne’ebé Estadu foti  sai parte hosi Política  para a Redução do Impacto Económico Negativo e a Recuperação Económica  Consequentes à Pandemia de COVID-19 ne’ebé aprova ho Rezolusaun Governu iha 31 marsu no tuir “Política Económica  de Resposta à COVID-19, aprova hosi Comissão Interministerial  de Coordenação da Implementação das Medidas de Prevenção Controlo do Surto do Novo Coronavirus.

Parte husi medidas sosiu ekonómiku hatan ba COVID-19, Estadu fó apoiu finanseiru ba empregu sira hodi selu subsidiu salariál 60% ba traballadór sira no selu $100 ba uma-kain hamutuk besik 327 mil iha Timor-Leste laran tomak.

Jornalista : Cipriano Colo

Editór       : Cancio Ximenes

3 KOMENTÁRIU

  1. Ami funsiunariu,maibe ami mos kredit.Ami mos bele hetan oportunidade para hetan subsidio hosi 60% nee ka lae?

HAKEREK NO HATÁN

Please enter your comment!
Please enter your name here